Milliy termadan haydalish arafasida turgan Samvel Babayan tarqalib ketish ostonasidagi klub bilan muzokaralar o‘tkazdi

Futbol bo‘yicha O‘zbekiston milliy terma jamoasi bosh murabbiyi Samvel Babayan “Obod” futbol klubi rahbariyati bilan muzokaralar o‘tkazdi. Bu haqda klub bosh murabbiyi Rauf Inileyev ma’lum qildi, deya xabar bermoqda “Championat.asia”.

Rauf Inileyevning ta’kidlashicha, Samvel Babayan “‘Obod’ boshqaruvini olish bo‘yicha muzokaralar o‘tkazgan”.

Samvel Babayan “Obod” boshqaruvini olishi haqidagi gap-so‘zlarni eshitdim. Shunday muzokaralar bo‘ldi ham. Ammo muzokaralar men bilan emas, rahbariyat bilan o‘tkazilgan. Shu bois nima bo‘lganini aniq bilmayman.

Rauf Inileyev, “Obod” futbol klubi bosh murabbiyi

Qayd etish joiz, Oliy Ligada ishtirok etuvchi va xususiy homiylar ko‘magida faoliyat olib boradigan “Obod” hozirda og‘ir ahvolga tushib qolgan. Inileyev klubning so‘nggi uch oydagi faoliyatini “professional emas, havaskor” deb baholaydi.

Uch oydan buyon maoshlar yo‘q. Safar o‘yinlariga o‘z yonimizdan xarajat qilib borib kelayotgandik. Moliyaviy qiyinchiliklar sabab, safarga 12—13 nafar futbolchi bilan borayotgandik. Ruhiy jihatdan o‘yinlarga juda og‘ir tayyorgarlik ko‘rardik.

Bosh homiy o‘z ishlarida muammo chiqqani tufayli bizni moliyalashtirishni to‘xtatishini ma’lum qildi. Ikkinchi davrada “Obod” chempionatda o‘ynamaydimi? Biz hal qilmaymiz. Birinchi davra oxirigacha o‘ynashga so‘z bergandik. Boshqa homiylar paydo bo‘lishiga umid qilgandik, ammo...

Rauf Inileyev, “Obod” futbol klubi bosh murabbiyi

Ma’lumot o‘rnida, Samvel Babayan qo‘l ostidagi O‘zbekiston milliy terma jamoasi ham 2018-yili Rossiyada bo‘lib o‘tadigan jahon chempionati yo‘llanmasi uchun kurashda murakkab ahvolga tushib qolgan. Sakkiz uchrashuvdan so‘ng milliy terma 12 ochko to‘plagani holda saralash guruhida uchinchi bo‘lib turdi.

Jamoa 31-avgust kuni Marchello Lippi qo‘l ostidagi Xitoy mehmoni bo‘ladi, 5-sentabr kuni esa Toshkentga yangi murabbiy bilan keladigan Janubiy Koreyani qabul qiladi. Terma jamoa JCh—2018 ga to‘g‘ridan-to‘g‘ri yo‘llanma olishi uchun mazkur ikki o‘yinda g‘alaba qozonishi shart.

Biroq milliy termaning saralashdagi so‘nggi o‘yinlari nafaqat futbol muxlislari, balki futbol mutaxassislari tomonidan ham keskin tanqid qilinmoqda, Babayanning o‘zi esa “qochib yuribdi”. Ayni shu vaziyatda O‘FF rahbariyati Babayan boshliq murabbiylarga “vazifani oxiriga yetkazib qo‘yish uchun 5-sentabrgacha imkoniyat” berdi.

Babayanning milliy terma jamoada qolish-qolmasligi 5-sentabrdan so‘ng ma’lum bo‘ladi. Ungacha “Obod” futbol klubi tarqalib ketishi ham mumkin. Babayanning milliy termadan avvalgi ish joyi — “Paxtakor” futbol klubi esa kuni kecha yangi bosh murabbiyni tanishtirib, jamoani superklubga aylantirish rejalarini e’lon qildi.