Isroil hukumati Quddusdagi Ibodatxona tog‘i hududida joriy etgan xavfsizlik choralarini bekor qilmaydi. Bu haqda 23-iyul, yakshanba kuni mamlakat bosh vaziri Binyamin Netanyaxu ma’lum qildi, deya xabar beradi “TASS”.
“Ibodatxona tog‘ini himoya qilish tizimi o‘zgarishsiz qoladi”, — ta’kidladi Netanyaxu kuch tizimlari rahbarlari ishtirokidagi yig‘ilishdan so‘ng.
Almayadeen telekanaliga ko‘ra, mazkur yig‘ilish armiya qo‘mondonligi tomonidan Quddusning arab qismidagi g‘alayonlar Isroilga qarshi yangi isyonga aylanib ketishi va Iordan daryosining G‘arbiy qirg‘og‘ini qamrab olishi ehtimoli haqidagi ogohlantirishlardan so‘ng o‘tkazildi.
Ilgari xabar qilinganidek, o‘tgan hafta uch jangari Ibodatxona tog‘ida ikki politsiyachini o‘ldirib ketgani bu hududda xavfsizlik choralarining kuchaytirilishiga sabab bo‘ldi. Jumladan, Ibodatxona tog‘iga chiqish uchun metall aniqlovchi romlardan o‘tish talab etiladi. Bundan tashqari, elikka to‘lmagan musulmonlarga al-Aqsoda namoz o‘qish taqiqlandi.
Bu choralar mahalliy musulmonlar orasida keskin noroziliklarga sabab bo‘ldi. Ular namoyishlar uyushtirmoqda, shuningdek, politsiya bilan to‘qnashuvlarga kirishmoqda.
Izoh (0)