Hindistonlik sozanda bosh miyasida operatsiya o‘tkazilgan 7 soat davomida gitara chalish bilan band bo‘ldi

Hindistonlik sozanda bosh miyasida operatsiya o‘tkazilgan 7 soat davomida gitara chalish bilan band bo‘ldi. Bu haqda “RIA Novosti” xabar bermoqda.

Bangalorda yashovchi Abxishek Prasad  2012-yilda orzusini amalga oshirish va musiqa bilan shug‘ullanish uchun IT-mutaxassis lavozimini tark etdi. Biroq u qo‘l barmoqlariga ta’sir o‘tkazuvchi va mushaklarni beixtiyor qisqarishga majbur etuvchi mushak distoniyasi xastaligiga chalingandi.

7 soat davom etgan operatsiya davomida erkak neyrojarrohlarga bosh miyasidagi muammoli joylarni aniqlashda yordam berish uchun hushida qoldi.

“Shifokor menga ‘gitarani o‘zingiz bilan operatsiya xonasiga oling, o‘zingizni qanday his etayotganingizni doim bilib turishim kerak’, dedi”, — hikoya qildi sozanda.

Prasadga ko‘ra, operatsiya muvaffaqiyatli o‘tdi va u bir yildan so‘ng o‘zining ilk albomini chiqarish niyatida.