Ikki hafta avval Alp tog‘laridagi Matterxorn cho‘qqisiga ko‘tarilish chog‘ida halok bo‘lgan 22 yoshli italiyalik alpinist Luka Borgonining onasi 21-iyul, juma kuni Turin universitetida uning diplom ishini himoya qildi. Bu haqda “RIA Novosti” xabar berdi.
Biologiya fakultetida tahsilni yakunlagan Borgoni iyul boshida imtihon komissiyasiga “Katta balandlikda kishining sport jihatdan faolligiga lavlagi sharbatining ta’siri” mavzusida diplom ishini topshirgan, uning himoyasi 21-iyulga belgilangandi.
Dafn marosimida o‘qituvchilar Kristina Jordanadan belgilangan muddatda universitetga kelish va o‘g‘lining ishini himoya qilishni so‘radi. Maktabda matematika o‘qituvchisi bo‘lib ishlaydigan ayol bu taklifga o‘ylab ham ko‘rmay rozi bo‘ldi.
“Hozirda o‘zim ikkinchi oliy ma’lumotni olishga tayyorgarlik ko‘ryapman, biroq ayni paytda men uchun eng muhimi — o‘g‘limning o‘rnida bo‘lish”, — dedi Kristina Jordana jurnalistlarga.
Izoh (0)