Toshkent shahridagi Do‘mbirobod qabristonining bir qator uchastkalarida daraxt kesish ishlari vaqtida qabrtoshlar, yodgorliklar buzilgan. Bu haqda Yelena Komissarova Facebook’dagi guruhlardan birida xabar qoldirgan.
“Bugun bobomni xotirlab, Do‘mbirobod qabristoniga borgandik, u yerdagi tahqirlikdan shunchaki dahshatga tushdik: daraxtlarni kesib, qayerga yiqitishayotganiga qarashmayapti, axir ularning ostida yodgorliklar bor-ku! Har beshinchi yodgorlik buzilgan. Atrof vayrona, tosh uyumlari, singan suratlarga to‘lgan. Kim, qanday yurak bilan shu ishni qildi?”, — deb yozadi Facebook foydalanuvchisi.
Uning qo‘shimcha qilishicha, qabriston direktori joyida bo‘lmagan, u bilan bog‘lanish imkoni topilmagan — qabriston xodimlari uning ismi va familiyasini aytmagan.
“Qariyalar bu holni ko‘rib, qaltirab qolishdi, yig‘lab-siqtashdi. Buni so‘z bilan ifodalab bo‘lmaydi... Buning uchun kim javob beradi? Bularning barini kim qayta tiklaydi?”, — deb savol qo‘ygan Yelena Komissarova.
Muhokamaga qo‘shilgan foydalanuvchilardan biri ikki kun avval qabristonda bo‘lib, xuddi shunday manzaraga guvohi bo‘lganini, so‘ng qabriston ma’muriyatiga shikoyat qilganini ma’lum qilgan.
“U yerda menga barchasi kelasi shanbaga qadar tartibga keltirilishini aytishdi”, — deb yozadi u.
Ayni vaqtda, foydalanuvchilardan biri mozorlardagi ko‘p yillik daraxtlarning kesilishi qabrlarga zarar yetkazishi mumkinligidan ogohlantirgan.
“Yodgorliklarning buzilgani — fojianing bir qismi, xolos. Endi kuchli yog‘ingarchilik bo‘lgan vaqtda qabrlar o‘pirilishni boshlaydi, chunki suv o‘ziga boshqa yo‘l topolmaydi. Shu yili Minordagi qabristonda shunday bo‘lganida, daraxtlar kesilganidan so‘ng suv qabrlar ichiga tushishni boshlaganini aytishgan edi”, — deb yozgan foydalanuvchi.
Ma’lumot uchun, Do‘mbirobod mozori Toshkent shahridagi 2-son rus qabristoni bo‘lib, 1964-yilda ochilgan va hozirgi vaqtda bu yerda nafaqat nasroniylar, balki yahudiy va musulmonlar ham dafn etiladi.
Qabristonning nasroniy qismida Toshkentning ko‘plab mashhur olimlari, ziyolilari, xususan, Mixail Masson, Boris Lunin va boshqalar dafn etilgan. 11-iyul kuni aynan akademiklar Masson va Galina Puganchenkovalarning qabriga yodgorlik o‘rnatilgani haqida xabar berilgan edi.
Izoh (0)