Otasining AQSh sanoatini qayta tiklash va Amerikada tayyorlangan mahsulotlarni sotib olishga chaqiriqlarga qaramay, Ivanka Trampga qarashli kompaniyalar arzon xorijiy ishchi kuchidan foydalanadi. The Washington Post gazetasi shunday xulosaga keldi, deya xabar beradi “TASS”.
Prezident Trampga nisbatan tanqidiy yondoshadigan mazkur nashr uning qiziga tegishli kompaniya Ivanka Trump brendi ostida ayollar kiyimi, poyabzal, sumka va akssesuarlar ishlab chiqarishni ishchilar o‘ta past maosh oladigan mamlakatlarda yo‘lga qo‘yganiga e’tibor qaratdi.
Jumladan, kiyim-kechak va poyabzal Xitoy, Hindiston, Bangladesh, Indoneziya va Efiopiyada ishlab chiqariladi. Tekshiruv olib borgan jurnalistlar Indoneziyadagi tikuvchi oyiga 173, Bangladeshdagi xodim esa 70 dollar ish haqi olishini aniqladi.
Ivanka Trump prezidenti Abigeyl Klem kompaniya yetkazib beruvchilar uchun ishlab chiqilgan axloq qoidalari me’yorlari kodeksiga ega ekanligi va ishchilar huquqiga rioya etish bo‘yicha maslahatchilarni yollash niyatida ekanligini bildirdi.
Shu bilan birga, u AQShda tikuvchilik mahsuloti ishlab chiqarish nihoyatda mushkul ekanligi, mamlakatda shu sohadagi malakali ishchi-xodimlar deyarli qolmaganini tan oldi.
Izoh (0)