Hayvonot bog‘ida Himolay ayig‘iga tosh otgan shaxs ijtimoiy tarmoq foydalanuvchilarining g‘azabiga uchradi

Olmaotadagi hayvonot bog‘iga tashrif buyurgan shaxs nabiralarini xursand qilish uchun Himolay ayig‘iga tosh otdi, deb xabar berdi Kazakhstan Today.

“Kecha yoshi katta erkak ayiq joylashgan qafasga yaqinlashib uxlayotgan Himolay ayig‘ining boshiga tosh otdi. U bu bilan nabiralarini xursand qilmoqchi bo‘ldi. Bundaylarni nima qilish kerak?”, — deydi hayvonot bog‘i direktori Erjan Erkinboyev Instagram’dagi sahifasida.

Ijtimoiy tarmoq foydalanuvchilari yoshi katta erkakning bu kabi qilig‘idan g‘azablanganini bilish mumkin. Xususan, ularning bir qismi qonunbuzarni ikki kunga ayiq qafasiga qamab qo‘yish kerak deya taklif bildirsa, boshqalari ma’muriy jarimaga tortish, shuningdek, hayvonot bog‘i “qora ro‘yxatiga” kiritib qo‘yish kerak demoqda.