Toshkentda “Jahon adabiyoti” jurnalining 20 yilligi munosabati bilan xalqaro ilmiy-amaliy konferensiya bo‘lib o‘tdi

Toshkentda 4-iyul, seshanba kuni “Jahon adabiyoti” jurnalining 20 yilligi munosabati bilan xalqaro ilmiy-amaliy konferensiya bo‘lib o‘tdi. Bu haqda O‘zA xabar bermoqda.

“O‘zbekistonda mustaqillik davri ma’naviyati rivojida ‘Jahon adabiyoti’ jurnalining tutgan o‘rni va ahamiyati” mavzusida tashkil etilgan anjumanda mamlakatimizdagi davlat va jamoat tashkilotlari, diplomatik korpus va xalqaro tashkilotlar vakillari, yozuvchi va shoirlar, adabiyotshunoslar, tarjimonlar, yosh ijodkorlar ishtirok etdi.

Tadbirda O‘zbekiston Yozuvchilar uyushmasi raisi Muhammadali Ahmedov, akademik Baxtiyor Nazarov, Alisher Navoiy nomidagi Toshkent davlat o‘zbek tili va adabiyoti universiteti rektori Shuhrat Sirojiddinov, “Jahon adabiyoti” jurnali bosh muharriri Shuhrat Rizayev va boshqalar mamlakatimizda ma’naviy islohotlar samaradorligini oshirish jarayonida kitobxonlik madaniyatini shakllantirish, ta’lim muassasalarini badiiy, ma’rifiy, ilmiy-ommabop va tarbiyaviy adabiyotlar bilan ta’minlashni yanada kuchaytirishga alohida e’tibor qaratilayotgani, avvalo, yosh avlodni har jihatdan yetuk insonlar qilib tarbiyalashdek ezgu maqsadlarga xizmat qilayotganini ta’kidladi.

Jurnal yigirma yil avval – 1997-yil 27-fevralda O‘zbekiston Respublikasining Birinchi Prezidenti Islom Karimov tashabbusi bilan O‘zbekiston Respublikasi Vazirlar Mahkamasining qarori asosida tashkil etilgan. Bu yangilik mamlakat ma’naviy-madaniy hayotida tarixiy voqea bo‘lgan edi. O‘zbekiston Qahramoni, atoqli adabiyotshunos olim Ozod Sharafiddinovning fidokorona xizmatlari, jonkuyarligi va tashkilotchiligi bilan qisqa fursatda tahririyatda taniqli tarjimonlar, adiblar, munaqqidlar jam bo‘lgan, ularning samarali mehnati natijasida mazkur jurnal nufuzli nashrga aylandi. O‘tgan davrda jurnalning 240 soni nashrdan chiqdi. Ularda 100 dan ortiq roman, 200 dan ziyod qissa, mingdan ortiq hikoya va novella, mingga yaqin ijtimoiy-falsafiy, adabiy-badiiy, ilmiy-nazariy maqola va esselar e’lon qilindi.

O‘zbekiston Respublikasi Vazirlar Mahkamasining 2017-yil 7-mart kuni bo‘lib o‘tgan yig‘ilishida davlat rahbari Shavkat Mirziyoyevning joriy yil 12-yanvardagi “Kitob mahsulotlarini chop etish va tarqatish tizimini rivojlantirish, kitob mutolaasi va kitobxonlik madaniyatini oshirish hamda targ‘ibot qilish bo‘yicha komissiya tuzish to‘g‘risida”gi farmoyishida belgilangan vazifalar ijrosi doirasida jurnal tashkil etilganining yigirma yilligini munosib nishonlash masalasi ko‘zda tutilgan edi. Aprel-may oylarida mamlakatimizdagi qator oliy o‘quv yurtlarida talaba-yoshlar, keng jamoatchilik ishtirokida o‘tkazilgan ijodiy uchrashuvlar yuqori saviyada tashkil etildi.

Tadbirda mazkur jurnal jahon adabiyoti sari ochilgan yo‘l ekani, ijodkorlarimiz bu orqali dunyo adabiyoti manzaralarini kuzatish jarayonida o‘z ijodiy salohiyatini yuksaltirayotgani qayd etildi. Nashr o‘zbek tarjima san’atini yangi bosqichga ko‘tarishda ham o‘ziga xos maktab vazifasini o‘tamoqda. So‘nggi yillarda jurnal mazmunan va shaklan yangilandi. Yangi ruknlarda jahon adabiyotining oxirgi yillardagi sara asarlari e’lon qilindi. Ilg‘or adabiy-falsafiy qarashlar yoritildi, navqiron tarjimonlar avlodi shakllandi. Xorijiy tillardan to‘g‘ridan to‘g‘ri tarjima qilish – asliyatdan o‘girishga e’tibor qaratildi.

Bugungi murakkab globallashuv davrida milliy ma’naviyat, milliy o‘zlik va madaniyatni asrab qolish, o‘z mustaqil fikri, dunyoqarashi va e’tiqodiga ega, yuksak axloqli yoshlarni tarbiyalash davlatimiz siyosatining eng muhim masalalaridan biriga aylandi. Jurnalimiz shakl-shamoyili va mundarijasini bugungi davrning ana shunday o‘tkir va dolzarb talablaridan kelib chiqib belgilamoqdamiz. Ayniqsa, yosh avlodning ongu tafakkurini boyitish, ular qalbini ezgu g‘oyalar, oydin orzular bilan to‘ldirishda jahon adabiyoti namunalari o‘ziga xos ko‘prik vazifasini o‘taydi.

Shuhrat Rizayev “Jahon adabiyoti” jurnali bosh muharriri