25-may kuni Toshkent shahri va viloyatlar markazlarida “Adabiyotga e’tibor — kelajakka, ma’naviyatga e’tibor” shiori ostida Respublika “Kitob bayrami” o‘z faoliyatini boshladi. “Kitob bayrami”ning bosh ochilish marosimi Toshkent shahrining G‘afur G‘ulom nomidagi madaniyat va istirohat bog‘ida bo‘lib o‘tdi. Bu haqda O‘zbekiston matbuot va axborot agentligi matbuot xizmati xabar berdi.
Ushbu ijtimoiy, ma’naviy-ma’rifiy tadbir O‘zbekiston matbuot va axborot agentligi va bir qator davlat va jamoat tashkilotlari bilan hamkorlikda o‘tkazilmoqda. Unda 100 dan ziyod nashriyot va matbaa korxonalari ishtirok etmoqda.
26-may kuni “Kitob bayrami” doirasida O‘zbekiston Matbuot va axborot agentligi, Fanlar akademiyasi, Xalq ta’limi vazirligi, Oliy va o‘rta maxsus ta’lim vazirligi, Madaniyat vazirligi, Yozuvchilar uyushmasi va “Kamolot” yoshlar ijtimoiy harakati Markaziy Kengashi hamkorligida tashkil etilgan “Kitob — millatning bebaho madaniy va ma’naviy merosi” mavzuida V ilmiy-amaliy konferensiya bo‘lib o‘tdi. Mazkur anjumanda noshirlik faoliyatini qo‘llab-quvvatlashning tashkiliy-huquqiy asoslari, tarixiy asarlarni nashrga tayyorlashning o‘ziga xos jihatlari hamda yoshlarda kitobxonlik madaniyatini shakllantirishda kutubxona va axborot-kutubxona muassasalarining ahamiyati kabi dolzarb mavzular muhokama qilindi.
Eslatib o‘tamiz, “Kitob bayrami” 27-may kuniga qadar davom etadi.
Izoh (0)