Тошкентда 4 июль, сешанба куни «Жаҳон адабиёти» журналининг 20 йиллиги муносабати билан халқаро илмий-амалий конференция бўлиб ўтди. Бу ҳақда ЎзА хабар бермоқда.
«Ўзбекистонда мустақиллик даври маънавияти ривожида ‘Жаҳон адабиёти’ журналининг тутган ўрни ва аҳамияти» мавзусида ташкил этилган анжуманда мамлакатимиздаги давлат ва жамоат ташкилотлари, дипломатик корпус ва халқаро ташкилотлар вакиллари, ёзувчи ва шоирлар, адабиётшунослар, таржимонлар, ёш ижодкорлар иштирок этди.
Тадбирда Ўзбекистон Ёзувчилар уюшмаси раиси Муҳаммадали Аҳмедов, академик Бахтиёр Назаров, Алишер Навоий номидаги Тошкент давлат ўзбек тили ва адабиёти университети ректори Шуҳрат Сирожиддинов, «Жаҳон адабиёти» журнали бош муҳаррири Шуҳрат Ризаев ва бошқалар мамлакатимизда маънавий ислоҳотлар самарадорлигини ошириш жараёнида китобхонлик маданиятини шакллантириш, таълим муассасаларини бадиий, маърифий, илмий-оммабоп ва тарбиявий адабиётлар билан таъминлашни янада кучайтиришга алоҳида эътибор қаратилаётгани, аввало, ёш авлодни ҳар жиҳатдан етук инсонлар қилиб тарбиялашдек эзгу мақсадларга хизмат қилаётганини таъкидлади.
Журнал йигирма йил аввал – 1997 йил 27 февралда Ўзбекистон Республикасининг Биринчи Президенти Ислом Каримов ташаббуси билан Ўзбекистон Республикаси Вазирлар Маҳкамасининг қарори асосида ташкил этилган. Бу янгилик мамлакат маънавий-маданий ҳаётида тарихий воқеа бўлган эди. Ўзбекистон Қаҳрамони, атоқли адабиётшунос олим Озод Шарафиддиновнинг фидокорона хизматлари, жонкуярлиги ва ташкилотчилиги билан қисқа фурсатда таҳририятда таниқли таржимонлар, адиблар, мунаққидлар жам бўлган, уларнинг самарали меҳнати натижасида мазкур журнал нуфузли нашрга айланди. Ўтган даврда журналнинг 240 сони нашрдан чиқди. Уларда 100 дан ортиқ роман, 200 дан зиёд қисса, мингдан ортиқ ҳикоя ва новелла, мингга яқин ижтимоий-фалсафий, адабий-бадиий, илмий-назарий мақола ва эсселар эълон қилинди.
Ўзбекистон Республикаси Вазирлар Маҳкамасининг 2017 йил 7 март куни бўлиб ўтган йиғилишида давлат раҳбари Шавкат Мирзиёевнинг жорий йил 12 январдаги «Китоб маҳсулотларини чоп этиш ва тарқатиш тизимини ривожлантириш, китоб мутолааси ва китобхонлик маданиятини ошириш ҳамда тарғибот қилиш бўйича комиссия тузиш тўғрисида»ги фармойишида белгиланган вазифалар ижроси доирасида журнал ташкил этилганининг йигирма йиллигини муносиб нишонлаш масаласи кўзда тутилган эди. Апрель май ойларида мамлакатимиздаги қатор олий ўқув юртларида талаба-ёшлар, кенг жамоатчилик иштирокида ўтказилган ижодий учрашувлар юқори савияда ташкил этилди.
Тадбирда мазкур журнал жаҳон адабиёти сари очилган йўл экани, ижодкорларимиз бу орқали дунё адабиёти манзараларини кузатиш жараёнида ўз ижодий салоҳиятини юксалтираётгани қайд этилди. Нашр ўзбек таржима санъатини янги босқичга кўтаришда ҳам ўзига хос мактаб вазифасини ўтамоқда. Сўнгги йилларда журнал мазмунан ва шаклан янгиланди. Янги рукнларда жаҳон адабиётининг охирги йиллардаги сара асарлари эълон қилинди. Илғор адабий-фалсафий қарашлар ёритилди, навқирон таржимонлар авлоди шаклланди. Хорижий тиллардан тўғридан тўғри таржима қилиш – аслиятдан ўгиришга эътибор қаратилди.
Бугунги мураккаб глобаллашув даврида миллий маънавият, миллий ўзлик ва маданиятни асраб қолиш, ўз мустақил фикри, дунёқараши ва эътиқодига эга, юксак ахлоқли ёшларни тарбиялаш давлатимиз сиёсатининг энг муҳим масалаларидан бирига айланди. Журналимиз шакл-шамойили ва мундарижасини бугунги даврнинг ана шундай ўткир ва долзарб талабларидан келиб чиқиб белгиламоқдамиз. Айниқса, ёш авлоднинг онгу тафаккурини бойитиш, улар қалбини эзгу ғоялар, ойдин орзулар билан тўлдиришда жаҳон адабиёти намуналари ўзига хос кўприк вазифасини ўтайди.Конференцияда бадиий тафаккуримиз юксалишида «Жаҳон адабиёти» журналининг ўрни, дунё адабиёти намуналарини ўзбек тилига таржима қилиш муаммолари, мазкур нашрда Ғарб адабиётшунослиги талқини каби мавзуларда маърузалар тингланди.Шуҳрат Ризаев «Жаҳон адабиёти» журнали бош муҳаррири
Изоҳ (0)