Abdulaziz Komilov: Rossiyada qilingan deportatsiya faqat Rossiya sudi tomonidan bekor qilinadi

O‘zbekiston tashqi ishlar vaziri Abdulaziz Komilov 5-iyulda fuqarolar hamda O‘zbekistonning xorijiy mamlakatlardagi elchixona va konsulliklari bilan to‘g‘ridan-to‘g‘ri videomuloqot o‘tkazdi. Vazir O‘zbekistonning mamlakatda va xorijiy davlatlarda yashayotgan fuqarolari tomonidan berilgan savollarga javob berdi.

Muloqot davomida eng ko‘p berilgan savollardan biri Rossiyaga ishlash uchun borgan va u yerda deportatsiya qilingan fuqarolardan bo‘ldi. Savollarning asosiy mazmuni deportatsiyani bekor qilishda amaliy yordam so‘rashdan iborat.

Abdulaziz Komilov bu mazmundagi savollarga javob berar ekan, deportatsiyaning bekor qilinishi, avvalo, Rossiya ichki ishlar vazirligiga, shuningdek, sud qaroriga bog‘liqligini aytib o‘tdi.

Taqiqni bekor qilish faqat sud qarori bilan amalga oshiriladi. Sud qarori esa Rossiyada chiqishi kerak. Biz ham bu borada Rossiya ichki ishlar vazirligiga murojaat qilishimiz mumkin, Buning uchun fuqaro bizga yozma ravishda o‘z murojaatini berishi kerak. Biroq Rossiya ichki ishlar vazirligi bu masalada bizga javob bermasligi ham mumkin.

Abdulaziz Komilov, O‘zbekiston tashqi ishlar vaziri