Абдулазиз Комилов: Россияда қилинган депортация фақат Россия суди томонидан бекор қилинади

Ўзбекистон ташқи ишлар вазири Абдулазиз Комилов 5 июлда фуқаролар ҳамда Ўзбекистоннинг хорижий мамлакатлардаги элчихона ва консулликлари билан тўғридан-тўғри видеомулоқот ўтказди. Вазир Ўзбекистоннинг мамлакатда ва хорижий давлатларда яшаётган фуқаролари томонидан берилган саволларга жавоб берди.

Мулоқот давомида энг кўп берилган саволлардан бири Россияга ишлаш учун борган ва у ерда депортация қилинган фуқаролардан бўлди. Саволларнинг асосий мазмуни депортацияни бекор қилишда амалий ёрдам сўрашдан иборат.

Абдулазиз Комилов бу мазмундаги саволларга жавоб берар экан, депортациянинг бекор қилиниши, аввало, Россия ички ишлар вазирлигига, шунингдек, суд қарорига боғлиқлигини айтиб ўтди.

Тақиқни бекор қилиш фақат суд қарори билан амалга оширилади. Суд қарори эса Россияда чиқиши керак. Биз ҳам бу борада Россия ички ишлар вазирлигига мурожаат қилишимиз мумкин, Бунинг учун фуқаро бизга ёзма равишда ўз мурожаатини бериши керак. Бироқ Россия ички ишлар вазирлиги бу масалада бизга жавоб бермаслиги ҳам мумкин.

Абдулазиз Комилов, Ўзбекистон ташқи ишлар вазири