Prezident Shavkat Mirziyoyev “Kamolot” YoIHning IV qurultoyida nutq so‘zlab, tashkilot faoliyatidagi kamchiliklarni tanqid ostiga oldi. Davlat rahbari tashkilot o‘ziga yuklatilgan vazifalarni keraklicha bajara olmayotganini ta’kidladi.
“Kamolot” butun O‘zbekiston yoshlarini birlashtirgan, tom ma’nodagi ommaviy harakatga aylana olmadi. U asosan o‘z atrofida Harakat faoliyatiga xayrixoh bo‘lgan yoshlarni uyushtirib, faqat ularni qiziqtirgan masalalar yuzasidangina ish olib bordi.Prezident tomonidan qayd etilishicha, hozirgi vaqtda “Kamolot”ning 4 millionga yaqin a’zosi bor. Bu mamlakatdagi 10 milliondan ziyod yigit-qizlarning 40 foizini tashkil etadi.Natijada yoshlarning keng qatlamlariga taalluqli bo‘lgan dolzarb masalalar, avvalo, yoshlarning bandligini ta’minlash, ularni katta maqsadlar sari safarbar etish, uyushmagan yoshlar bilan ishlash, qisqacha aytganda, yoshlarning huquq va manfaatlarini himoya qilish bo‘yicha o‘zini haqiqiy yoshlar tashkiloti sifatida ko‘rsata olmadi.
Shavkat Mirziyoyev, O‘zbekiston Prezidenti
Natijada yurtimizdagi minglab yoshlar, ayniqsa, qishloq joylarda nafaqat “Kamolot”ning, ayni vaqtda davlat va jamiyatning e’tiboridan chetda qolmoqda. Ular bilan hech kim deyarli shug‘ullanmayapti, ular o‘z holiga tashlab qo‘yilgan, desak, achchiq haqiqatni tan olgan bo‘lamiz.Mavjud kamchiliklarning obyektiv sabablari sifatida “Kamolot”ni jamoat tashkiloti sifatida tuzib, lekin undan katta bir vazirlik vazifasini talab qilingani, unga juda keng, ulkan vazifalarni topshirib, ammo ularni bajarish uchun zarur huquqiy va amaliy vakolatlar, tegishli imkoniyat va imtiyozlar yaratib berilmagani ko‘rsatildi.Shavkat Mirziyoyev, O‘zbekiston Prezidenti
Tashkilotning aksariyat rahbarlari va xodimlari tomonidan ishga rasmiyatchilik bilan, yuzaki va loqayd munosabatda bo‘lish, maishatga, ichkilikbozlikka berilish kabi salbiy holatlarga yo‘l qo‘yilayotgani Shavkat Mirziyoyev tomonidan qattiq tanqid qilindi.
Tizimda ishlayotgan xodimlarni moddiy rag‘batlantirish va ijtimoiy qo‘llab-quvvatlashga yetarlicha e’tibor berilmayotgani nafaqat joylarda, balki Harakatning markaziy idorasida ham mehnat va hayot tajribasiga ega bo‘lgan malakali kadrlarning yetishmasligiga sabab bo‘lmoqda.
O‘rtacha oylik ish haqi 800 ming so‘mni tashkil etayotgani uchun ularning aksariyati oylik maoshi katta bo‘lgan boshqa ishlarga o‘tib ketyapti.Shavkat Mirziyoyev, O‘zbekiston Prezidenti
Izoh (0)