Qaysi mansabdor shaxslar O‘zbekiston Prezidenti roziligi bilan xizmat safariga chiqadi?

O‘zbekiston Respublikasi Prezidenti Shavkat Mirziyoyev qarori bilan xorijiy davlatlarga xizmat safarlari maxsus kelishuvni talab qiladigan mansabdor shaxslar ro‘yxatiga o‘zgarish va qo‘shimchalar kiritildi. Bu haqda Norma xabar bermoqda.

Endi Sudyalar oliy kengashi raisi va uning o‘rinbosari, shuningdek, Prezident huzuridagi Tadbirkorlik subyektlarining huquqlari va qonuniy manfaatlarini himoya qilish bo‘yicha vakiliga xizmat safariga chiqish uchun davlat rahbari roziligi talab etiladi.

Shuningdek, Sudyalar oliy kengashi sudyalari, Birinchi Prezident Islom Karimov nomidagi ilmiy-ma’rifiy memorial kompleks, H. Sulaymonova nomidagi Respublika sud ekspertizasi markazi rahbarlari xizmat safarlari Prezident devonining tegishli xizmatlari bilan kelishishi joriy etildi.

Ro‘yxatdan Tashqi siyosiy tadqiqotlar muvofiqlashtirish-tahlil markazi direktori va direktor o‘rinbosari, davlat oliy ta’lim muassasalari prorektorlari, MXX oliy ta’lim muassasalari rahbarlari, Inson huquqlari bo‘yicha milliy markaz direktori o‘rinbosari, Konstitutsiyaviy sud, Oliy sud, Davlat soliq qo‘mitasi mas’ul xodimlari chiqarildi.