Қирғизистон Марказий сайлов комиссиясига президентлик лавозими учун курашиш истагини билдириб ҳужжатлар тақдим этганлар сони 11 кишига етди. Бу ҳақда «ТАСС» хабар бермоқда.
«Икки киши — Темир Сариев ва Бакит Торобаев сиёсий партиялар съездларида илгари сурилди. Қолган 9 киши номзодини ўзи қўйган. Сайловда қатнашишга охирги талабнома ‘Дунё генераллари тинчлик учун’ халқаро ассоциацияси маслаҳатчиси Таалатбек Масадиқовдан келиб тушди», — таъкидлади комиссия вакиллари.
Номзодини ўзи илгари сурганлар орасида ҳозирда коррупцияда айбланиб, ҳибсда сақланаётган парламентдаги «Отамакон» фракцияси етакчиси Омурбек Текебаев ҳам бор.
Олдинроқ мамлакатнинг собиқ бош вазири ва «Республика» партияси раҳбари Омурбек Бабанов ҳам сайловларда иштирок истагини билдирганди.
Президент тарафдорларининг Қирғизистон Социал-демократик партияси сиёсий кенгаши амалдаги ҳукумат раҳбари Сооронбай Жеенбеков номзодини илгари суришга қарор қилди. Партия съезди 15 июлда бўлиб ўтади.
Изоҳ (0)