Bandlik va mehnat munosabatlari vaziri Aziz Abduhakimov AQShning O‘zbekistondagi Favqulodda va muxtor elchisi Pamela Spartlenni qabul qildi. Bu haqda vazirlik matbuot xizmati xabar bermoqda.
Uchrashuv davomida A. Abduhakimov mehmonlarni vazirlikka yuklangan yangi funksiya va vazifalar, kam ta’minlangan oilalarni manzilli ijtimoiy himoya qilish, ular uchun individual dasturlar ishlab chiqish, ish o‘rinlarini legallashtirish, imkoniyati cheklangan fuqarolar bandligi va mehnat sohasida gender tengligini ta’minlash choralari bilan tanishtirdi.
O‘zbekiston rahbariyati, hukumati va ijtimoiy sheriklar qishloq xo‘jalik sektorida mehnat qilayotganlarning, xususan, paxta yig‘im-terimida mehnat huquqlari va manfaatlarini ta’minlashga berayotgan e’tibori, majburiy mehnatning oldini olish bo‘yicha ko‘rilayotgan choralar haqida ma’lumot berildi.
Elchi qabul uchun minnatdorlik bildirdi. “AQSh O‘zbekistonda yuz berayotgan o‘zgarishlarni kuzatib bormoqda. Bu o‘zgarishlar barcha sohalarda ko‘rinmoqda”, — dedi Pamela Spratlen.
Uchrashuv yakunida tomonlar o‘zaro hamkorlik va mehnat huquqlari bo‘yicha muloqotni yanada mustahkamlash haqida kelishib oldi.
Izoh (0)