Бандлик ва меҳнат муносабатлари вазири Азиз Абдуҳакимов АҚШнинг Ўзбекистондаги Фавқулодда ва мухтор элчиси Памела Спартленни қабул қилди. Бу ҳақда вазирлик матбуот хизмати хабар бермоқда.
Учрашув давомида А. Абдуҳакимов меҳмонларни вазирликка юкланган янги функция ва вазифалар, кам таъминланган оилаларни манзилли ижтимоий ҳимоя қилиш, улар учун индивидуал дастурлар ишлаб чиқиш, иш ўринларини легаллаштириш, имконияти чекланган фуқаролар бандлиги ва меҳнат соҳасида гендер тенглигини таъминлаш чоралари билан таништирди.
Ўзбекистон раҳбарияти, ҳукумати ва ижтимоий шериклар қишлоқ хўжалик секторида меҳнат қилаётганларнинг, хусусан, пахта йиғим-теримида меҳнат ҳуқуқлари ва манфаатларини таъминлашга бераётган эътибори, мажбурий меҳнатнинг олдини олиш бўйича кўрилаётган чоралар ҳақида маълумот берилди.
Элчи қабул учун миннатдорлик билдирди. «АҚШ Ўзбекистонда юз бераётган ўзгаришларни кузатиб бормоқда. Бу ўзгаришлар барча соҳаларда кўринмоқда», — деди Памела Спратлен.
Учрашув якунида томонлар ўзаро ҳамкорлик ва меҳнат ҳуқуқлари бўйича мулоқотни янада мустаҳкамлаш ҳақида келишиб олди.
Изоҳ (0)