Apple, Samsung va Microsoft mahsulotlari ta’mirlash imkoniyati eng kam qurilmalar bo‘lib chiqdi. Greenpeace tashkiloti iFixit bilan hamkorlikda o‘tkazgan tadqiqot natijalari shundan dalolat bermoqda, deya xabar beradi “TASS”.
Ta’mirga yaroqlilik ko‘rsatkichining pastligi gadjetlarning akkumulyator kabi qismlarini utilizatsiya qilish jarayonini qiyinlashtiradi. Bu esa elektron chiqindilar ko‘payishiga olib keladi.
Tadqiqotlar davomida Greenpeace va iFixit 17 IT-kompaniyalar, jumladan, Apple, Dell, Fairphone, Samsung va Microsoft tomonidan ishlab chiqarilgan qurilmalarning 40 dan ortiq modelini o‘rganib chiqdi (ular orasida Samsung Galaxy S8 va Apple Retina MacBook ham bor). Mazkur qurilmalar batareyalarini olish yo o‘ta qiyin yoki dizaynning xususiyatlari tufayli umuman iloji yo‘q.
“Bu gadjetlar xizmat muddati qisqarishiga olib keladi va ular navbatdagi elektron chiqindiga aylanadi. Apple, Samsung va Microsoft kompaniyalarining foydalanuvchi ta’mirlashi o‘ta mushkul bo‘lgan mahsulotlari soni sezilarli darajada oshib bormoqda”, — ta’kidladi Greenpeace AQSh bo‘limi IT-sektori tahlilchisi Geri Kuk.
Izoh (0)