Samarqand viloyatida 4 yoshli bolaning qo‘lini qisib qolgan go‘sht maydalagich FVV xodimlari yordamida olib tashlandi

2017-yil 24-iyun kuni Samarqand viloyati Kattaqo‘rg‘on tumani Payshanba shaharchasi Navoiy mahallasida yashovchi 4 yoshli A.Ibragimov ota-onasining e’tiborsizligi tufayli elektr go‘sht maydalagich oldida o‘ynab o‘tirgan vaqtida qo‘lini go‘sht maydalagich qisib qoldi, deb xabar berdi Favqulodda vaziyatlar vazirligi matbuot xizmati.

Shundan so‘ng, A.Ibragimovning ota-onasi uni darhol RSHTTYoM Samarqand viloyati filialiga olib borgan. Shifokorlar bemorni ko‘rib yordam ko‘rsata olmasligini aytib Favqulodda vaziyatlar boshqarmasiga murojaat etishni tavsiya qilishgan.

Bolaning qo‘lini go‘sht maydalagichdan chiqarib olish maqsadida, Samarqand viloyati Favqulodda vaziyatlar boshqarmasi Qutqaruv otryadi shaxsiy tarkibi shifokorlar bilan hamkorlikda temir go‘sht maydalagichni bolgarka yordamida kesib, A.Ibragimovni o‘ng qo‘lini chiqarib olishda amaliy yordam ko‘rsatdi.