Абдуҳафиз Каримов Ўзбекистон молия вазирининг ўринбосари лавозимига тайинланди. Бу ҳақда Ўзбекистон Президенти матбуот хизмати хабар бермоқда.
Хабар беришларича, Ўзбекистон Президенти Шавкат Мирзиёев бу ҳақдаги тегишли қарорни 27 июнь, сешанба куни имзолаган. Абдуҳафиз Каримов 2011 йил майидан бери Самарқанд вилояти ҳокимлиги Молия бошқармаси бошлиғи лавозимида меҳнат қилиб келаётган эди.
Абдуҳафиз Каримов (1968 йил Самарқанд вилоятида туғилган) 1993 йилда Кировоград давлат педагогика институтини, 1999 йилда Самарқанд давлат университети, 2005 йилда Ўзбекистон Банк-молия академиясинини тамомлаган.
У меҳнат фаолиятини 1985 йилда Пастдарғом тумани «Ўзбекистон» жамоа хўжалигида ишчи сифатида бошлаган. 1993—1995 йилларда Пастдарғом тумани 70-мактабда ўқитувчи, 1995—2001 йилларда Пастдарғом тумани деҳқон-фермер хўжаликлари уюшмаси ҳисобчиси бўлиб ишлаган.
Абдуҳафиз Каримов 2001—2004 йилларда Самарқанд вилояти ҳокимлиги Молия бошқармаси ижтимоий-маданий тадбирларни молиялаштриш бўлими етакчи тафтишчи-назоратчиси, 2005—2006 йилларда шу бошқарманинг ижтимоий соҳа ва аҳолини ижтимоий ҳимоялаш бўлими бошлиғи ўринбосари лавозимида меҳнат қилган.
У 2006—2007 йилларда Пастдарғом тумани ҳокимлиги молия бўлимига мудирлик қилган. 2007—2009 йилларда Самарқанд вилояти ҳокимлиги Молия бошқармаси бошлиғи ўринбосари — халқ таълими муассасаларини молиялаштриш бўлими бошлиғи, 2009—2011 йилларда Пастдарғом тумани ҳокимининг иқтисодиёт ва ижтимоий ривожлантириш масалалари бўйича ўринбосари лавозимиларида ишлаган.
Маълумот учун, Ўзбекистон Президентининг 23 июндаги қарори билан молия вазири ўринбосарларидан бири Аҳадбек Ҳайдаров вазирлик раҳбарининг биринчи ўринбосари этиб тайинланган эди.
Вазирнинг аввалги биринчи ўринбосари Жамшид Қўчқоров эса июнь ойи бошида Ўзбекистон бош вазири ўринбосари — иқтисодий ривожлантириш, таркибий ўзгартиришлар, инвестициялар, банк ва молия тизимини ислоҳ қилиш, эркин иқтисодий ва кичик саноат зоналари фаолиятини мувофиқлаштириш масалалари комплексининг раҳбари этиб тайинланган.
Жамшид Қўчқоров мазкур лавозимда «Ўзбекинвест»га бош директор этиб тайинланган Рустам Азимовнинг ўрнини эгаллаган эди.