Qirg‘iziston poytaxti Bishkekda Markaziy Osiyodagi eng katta masjid qurilishi yakunlandi, deb yozadi “AA.com.tr”. Qurilish ishlari Turkiyaning Diniy jamg‘armasi ko‘magida olib borildi.
Usmoniylar imperiyasi davri me’morchiligi uslubidagi masjid Bishkekda 2012-yilda barpo etila boshlagan.
Masjidning yopiq qismi maydoni 7,5 ming kvadrat metrni tashkil qiladi. Masjid ichkarisida bir vaqtning o‘zida 6 ming nafargacha odam namoz o‘qishi mumkin.
Masjid majmuasi 500 ta avtomobil sig‘adigan turargohni, Qur’on o‘qish kurslarini tashkil qilish uchun xonalar, anjumanlar zali, yemakxona va favvorani o‘z ichiga oladi.
Masjid Anqaradagi Hojatepa tumanida joylashgan masjidga o‘xshatib qurilgan.
Qurilish rahbari Musa Demirji agentlikka ma’lum qilishicha, binokorlik ishlari yakunlagan, ayni paytda hududni obodonlashtirish ishlari qolgan, xolos. Uning so‘zlariga ko‘ra, masjidning 70 metrli ikki minorasi va ikkita kirish eshigi bor.
Izoh (0)