Миллий термадан ҳайдалиш арафасида турган Самвел Бабаян тарқалиб кетиш остонасидаги клуб билан музокаралар ўтказди

Футбол бўйича Ўзбекистон миллий терма жамоаси бош мураббийи Самвел Бабаян «Обод» футбол клуби раҳбарияти билан музокаралар ўтказди. Бу ҳақда клуб бош мураббийи Рауф Инилеев маълум қилди, дея хабар бермоқда «Championat.asia».

Рауф Инилеевнинг таъкидлашича, Самвел Бабаян «‘Обод’ бошқарувини олиш бўйича музокаралар ўтказган».

Самвел Бабаян «Обод» бошқарувини олиши ҳақидаги гап-сўзларни эшитдим. Шундай музокаралар бўлди ҳам. Аммо музокаралар мен билан эмас, раҳбарият билан ўтказилган. Шу боис нима бўлганини аниқ билмайман.

Рауф Инилеев, «Обод» футбол клуби бош мураббийи

Қайд этиш жоиз, Олий Лигада иштирок этувчи ва хусусий ҳомийлар кўмагида фаолият олиб борадиган «Обод» ҳозирда оғир аҳволга тушиб қолган. Инилеев клубнинг сўнгги уч ойдаги фаолиятини «профессионал эмас, ҳаваскор» деб баҳолайди.

Уч ойдан буён маошлар йўқ. Сафар ўйинларига ўз ёнимиздан харажат қилиб бориб келаётгандик. Молиявий қийинчиликлар сабаб, сафарга 12—13 нафар футболчи билан бораётгандик. Руҳий жиҳатдан ўйинларга жуда оғир тайёргарлик кўрардик.

Бош ҳомий ўз ишларида муаммо чиққани туфайли бизни молиялаштиришни тўхтатишини маълум қилди. Иккинчи даврада «Обод» чемпионатда ўйнамайдими? Биз ҳал қилмаймиз. Биринчи давра охиригача ўйнашга сўз бергандик. Бошқа ҳомийлар пайдо бўлишига умид қилгандик, аммо...

Рауф Инилеев, «Обод» футбол клуби бош мураббийи

Маълумот ўрнида, Самвел Бабаян қўл остидаги Ўзбекистон миллий терма жамоаси ҳам 2018 йили Россияда бўлиб ўтадиган жаҳон чемпионати йўлланмаси учун курашда мураккаб аҳволга тушиб қолган. Саккиз учрашувдан сўнг миллий терма 12 очко тўплагани ҳолда саралаш гуруҳида учинчи бўлиб турди.

Жамоа 31 август куни Марчелло Липпи қўл остидаги Хитой меҳмони бўлади, 5 сентябрь куни эса Тошкентга янги мураббий билан келадиган Жанубий Кореяни қабул қилади. Терма жамоа ЖЧ—2018 га тўғридан-тўғри йўлланма олиши учун мазкур икки ўйинда ғалаба қозониши шарт.

Бироқ миллий терманинг саралашдаги сўнгги ўйинлари нафақат футбол мухлислари, балки футбол мутахассислари томонидан ҳам кескин танқид қилинмоқда, Бабаяннинг ўзи эса «қочиб юрибди». Айни шу вазиятда ЎФФ раҳбарияти Бабаян бошлиқ мураббийларга «вазифани охирига етказиб қўйиш учун 5 сентябргача имконият» берди.

Бабаяннинг миллий терма жамоада қолиш-қолмаслиги 5 сентябрдан сўнг маълум бўлади. Унгача «Обод» футбол клуби тарқалиб кетиши ҳам мумкин. Бабаяннинг миллий термадан аввалги иш жойи — «Пахтакор» футбол клуби эса куни кеча янги бош мураббийни таништириб, жамоани суперклубга айлантириш режаларини эълон қилди.