Janubiy Koreya prezidenti Chje In Mun KXDRga 2018 yili Pxyonchxanda bo‘lib o‘tadigan qishki Olimpiya o‘yinlarida yagona jamoa bo‘lib ishtirok etishni taklif qildi. Bu haqda “RBK” xabar bermoqda.
Janubiy Koreya prezidenti mazkur taklifni Muju shahrida tashkil etilgan txekvonda bo‘yicha jahon chempionati ochilishida aytib o‘tdi. KXDR mazkur musobaqada qatnashishdan bosh tortganiga qaramay, ko‘rgazmali janglarda ishtirok etishi uchun bu yerga sportchilar delegatsiyasini yuborgan.
Janubiy Koreya prezidenti Chje In Mun Shimoliy Koreyadan kelgan sportchilarni olqishlar ekan, sport ikki mamlakat vakillarini yarashtira olishiga umid bildirdi. “Agar Pxyonchxandagi Olimpiadada Shimoliy Koreya delegatsiyasi ham ishtirok etsa, bu do‘stlik va tinchlik kabi Olimpiya qadriyatlarini amalga oshirishga katta hissa bo‘lib qo‘shilgan bo‘lur edi”, — dedi Janubiy Koreya davlat rahbari.
Avvalroq Janubiy Koreya madaniyat vaziri Chon Xvan KXDRga 2018 yilgi Olimpiya o‘yinlari tashkiliy ishlarida qatnashishni taklif qilgan edi. Xususan, u musobaqalarning bir qismini KXDRdagi Masikryun tog‘-chang‘i kurortida o‘tkazishni taklif qilgan edi.
Bundan tashqari, 12-iyun kuni Janubiy Koreya prezidenti Shimoliy Koreyaga futbol bo‘yicha 2030-yilgi jahon chempionatini birgalikda qabul qilish imkoniyatlarini o‘ylab ko‘rishni taklif qilgan edi. FIFA rahbari Janni Infantino esa mazkur tashabbusni qo‘llab-quvvatlagan.
Izoh (0)