AQShda Markaziy razvedka boshqarmasi xodimlaridan bir guruhi vending avtomatlardan hamkasblari o‘rgatgan sxema yordamida gazak va shirinliklar o‘g‘irlagani ma’lum bo‘lganidan so‘ng ishdan bo‘shatilgan. Bu haqda TJournal xabar berdi.
Umumiy zarar 3 ming dollardan oshdi. Hodisa 2013-yilda sodir bo‘lgan, biroq bu haqdagi ma’lumotlar axborot erkinligi haqidagi qonunga muvofiq endi oshkor etildi.
MRBning bir necha yollanma xodimi 2012—2013-yillarda internetdan uzib qo‘yib va FreedomPay tizimi yordamida to‘lov qilib, vending qurilmasidan yeguliklar o‘g‘irlagan. To‘lov amalga oshirilgan hisob-raqamlar esa bo‘m-bo‘sh bo‘lgan.
Avtomatlar egalari mahsulotlari yo‘qolayotganini payqaganidan so‘ng kuzatuv kameralari o‘rnatdi. Kameralar yeguliklarni o‘g‘irlayotgan MRB josuslarini qayd etdi.
Qo‘lga olingan xodimlar aybiga iqror bo‘ldi va ishdan bo‘shatildi. O‘zi avtomatlardagi kamchilikdan foydalangan va hamkasblariga bu haqda hikoya qilgan “yegulik xakerlari” rahbari ham fosh etildi.
Izoh (0)