Shavkat Mirziyoyev Farg‘onadagi mikroGESlar tajribasini boshqa hududlarga ham joriy etishni tavsiya qildi

Shavkat Mirziyoyev Farg‘ona shahridagi kichik sanoat zonasida MikroGES ilmiy-ishlab chiqarish korxonasi loyihasi bilan tanishdi. Bu haqda O‘zA xabar bermoqda.

MikroGES xalqaro tasnifga asosan quvvati 0,1 kilovattdan 100 kilovattgacha bo‘lgan gidroenergetik qurilma bo‘lib, u asosan gidroturbina, tasmali va reduktorli uzatmalar hamda asinxron generatordan iborat. MikroGES GESlarga nisbatan ekologik tozaligi, oddiyligi, arzonligi, texnologik jihatdan tayyorlash va ekspluatatsiya qilish osonligi bilan ajralib turadi.

Loyihada mikroGESlar ishlab chiqarishni tashkil qilish va hayotga tatbiq etish, Farg‘ona politexnika institutida gidroenergetika sohasi mutaxassislarini tayyorlash ko‘zda tutilgan.

MikroGESning quvvati 50 kilovatt bo‘lgan 2 tajriba nusxasi institut olimlari tomonidan “Farg‘onaazot” kompaniyasi va Marg‘ilon traktor ta’mirlash korxonasi bilan hamkorlikda Farg‘ona shahridan o‘tuvchi Marg‘ilonsoyga qo‘yilib, tajriba-sinovdan o‘tmoqda.

MikroGESlardan olinayotgan elektr energiya shaharning Kashtanzor ko‘chasi, “Marg‘ilonsoy” to‘yxonasi va “Hamkorbank” hududlarini yoritishda ishlatilmoqda.

Farg‘ona viloyati suv xo‘jaligi mutaxassislari bilan birgalikda viloyat hududidan o‘tuvchi soy va kanallarning gidrologik tasniflari o‘rganilib, dastlabki bosqichda 230 joyda quvvati 50 kilovattlik mikroGESlar o‘rnatish rejalashtirilgan.

Reja amalga oshgach, bir yilda 230 mikroGESdan olingan quvvat 92 million kilovattni yoki viloyatda bir yilda sarflanayotgan elektr energiyaning 2 foizini tashkil etadi. Bu yiliga 17 milliard so‘mlik elektr energiya tejaladi, deganidir.

“Prezident ushbu loyiha ilm-fan yutuqlarini amaliyotga joriy etish borasida olib borilayotgan izlanishlarning yaqqol namunasi ekanini ta’kidlab, mikroGESlarni ishlab chiqarishni ko‘paytirish va boshqa hududlarga ham izchil joriy etish bo‘yicha tavsiyalar berdi”, — deyiladi O‘zA axborotida.