Ostonada bo‘lib o‘tayotgan Yevrosiyo Media Forumida uning tashkilotchisi va Qozog‘iston siyosat arbobi Darig‘a Nazarboyeva “Daryo” bosh muharriri Alisher Azimov bilan blits-intervyu o‘tkazishga iltifot bilan rozilik berdi. Nazarboyeva O‘zbekiston haqida juda iliq fikrlar bildirdi.
“Sizning xalqingiz juda mehnatsevar. Qardosh respublikada faoliyatning barcha sohalarida bo‘lib o‘tayotgan islohotlar Qozog‘istonda katta qiziqishni keltirib chiqarmoqda. Ikki tomonlama aloqalarga so‘nggi paytda kuchli turtki berilgan, savdo-iqtisodiy aloqalarning mustahkamlanishi (biz buni sezyapmiz) quvontiradi va optimizmga yo‘naltiradi. Kichik biznes va xususiy tadbirkorlikning qo‘llab-quvvatlanishi kuchayishi sababli O‘zbekiston yaqin vaqtlardayoq mintaqaning rivojlangan mamlakatlari qatoriga kirishga qodir, bu esa o‘z navbatida, mintaqamizdagi iqtisodiy vaziyatga ijobiy ta’sir ko‘rsatadi. Katta salohiyatga ega ikki tomonlama aloqalar tez orada eng ijobiy samaralarni ko‘rsatishiga ishonchimiz komil, O‘zbekiston oliy rahbariyati ham shu narsaga chin dildan intilmoqda”, — dedi Darig‘a Nazarboyeva.
Insoniyatning global muammolari va ularni hal etish yo‘llariga qaratilgan xuddi shunday Yevrosiyo Media Forumini o‘tkazish imkoniyati haqidagi savolga javob berar ekan, Darig‘a Nazarboyeva bunday g‘oyani ma’qulladi va Qozog‘iston, o‘z navbatida, bunday ko‘lamdagi tadbirni o‘tkazish tajribasi bilan bo‘lishishga tayyorligini qo‘shib qo‘ydi.
Darig‘a Nazarboyeva mamlakatlarimiz o‘rtasida parlamentlararo hamkorlik doirasida 2017-yil sentabrida O‘zbekistonga tashrif buyurishni rejalashtirayotganini ma’lum qildi.
Eslatib o‘tamiz, har yili Qozog‘istonning Ostona shahrida o‘tkazilib, 60 mamlakatdan 600 dan ziyod delegatlarni to‘playdigan xalqaro bahs-munozara maydoni — Yevrosiyo Media Forumida bu yil “Daryo” nashri vakili ham qatnashmoqda.
Forum rasmiy saytida yozilishicha, Yevrosiyo Media Forumi hozirgi kunning eng dolzarb mavzulari bo‘yicha dunyo mediamaydonining eng ahamiyatli ishtirokchilari, fikrlar yetakchilari va turli sohalarning tan olingan professionallari ishtirokidagi ochiq muloqotdir.
Forum o‘z faoliyatini 2002-yilda boshlab, o‘shandan buyon siyosiy, iqtisodiy va ijtimoiy masalalarning keng doirasiga o‘z ta’sirini o‘tkaza oladigan, dunyo ko‘lamidagi hodisa sifatida o‘zini ko‘rsatdi, deyiladi rasmiy saytda.
Forum ta’sis etilgan vaqtdan buyon uning g‘oyaviy ilhomchisi va tashkiliy qo‘mita raisi sifatida siyosat fanlari doktori Darig‘a Nazarboyeva faoliyat yuritib kelmoqda.
Izoh (0)