Putin adashib Rossiya operatsiyasi deb atagan AQSh operatsiyasi videosi unga Shoygu tomonidan taqdim etilgani ma’lum bo‘ldi

Kreml rasmiy vakili Dmitriy Peskov Vladimir Putin amerikalik rejissor Oliver Stounga ko‘rsatgan videolavha prezidentga mudofaa vaziri Sergey Shoygu tomonidan taqdim etilganini bildirdi. Bu haqda Meduza xabar bermoqda.

“Tasdiqlashim mumkin, bu rostanam mudofaa vazirligimiz materiallari. Bu prezidentga keltirilgan hisobotning hisoboti, uni mudofaa vaziri prezidentga bergan edi”, — ma’lum qildi matbuot kotibi.

Oliver Stoun muallifligidagi “Putin” serialining uchinchi qismida Putin rejissorga Rossiya aviatsiyasi Suriyada qanday ishlayotgani aks etgan videoyozuvni ko‘rsatgan. Keyinroq ma’lum bo‘lishicha, aslida bu AQSh vertolyotidan olingan video bo‘lib, unda Afg‘onistonda “Tolibon”ning amerikaliklar tomonidan o‘qqa tutilishi aks etgan ekan.

Ilgariroq bu haqda Meduza’ga izoh berarkan, Peskov “Bunday emas. Bo‘lmagan gap” deb javob bergan edi.