Amerikalik rejissor Oliver Stoun Rossiya prezidenti Vladimir Putin unga namoyish etgan aviazarba videosiga izoh berdi. Bu haqda u Ruptly agentligi tomonidan translyatsiya qilingan matbuot anjumani chog‘ida aytib o‘tdi, deb xabar beradi “RIA Novosti”.
Ilgariroq Oliver Stoun muallifligidagi “Putin” serialining uchinchi qismida Putin rejissorga Rossiya aviatsiyasi Suriyada qanday ishlayotgani aks etgan videoyozuvni ko‘rsatgani ma’lum qilingan edi. Keyinroq bir qator blogerlar aslida bu AQSh vertolyotidan olingan video bo‘lib, unda Afg‘onistonda “Tolibon”ning amerikaliklar tomonidan o‘qqa tutilishi aks etgan ekanini yozib chiqdi.
Oliver Stoun bu haqda yozgan blogerlarning qay darajada ishonchli manba ekanligini shubha ostiga oldi hamda Rossiyaning soxta video ishlatishiga hech qanday sabab yo‘qligini aytib o‘tdi.
“Putin buni soxtalashtirib nima qiladi? Rossiya Suriyada IShIDga qarshi kurashga ulkan hissa qo‘shdi, ayniqsa IShID moliyaviy imperiyasini yo‘q qilishga”, — ta’kidladi kinoijodkor.
Stoun serialni suratga tushirish chog‘ida axborotni maksimal darajada aniq va xolis yetkazishga uringanini ta’kidladi.
Bir muddat ilgari Kreml vakili Dmitriy Peskov mazkur video prezidentga mudofaa vaziri Sergey Shoygu tomonidan taqdim etilganini aytib o‘tgan edi.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)