Tanishlarini Malayziyada fohishalik qilishi uchun olib ketmoqchi bo‘lgan ayol qo‘lga olindi

Toshkent viloyati IIBning xabar berishicha, o‘zining ikki tanishini Malayziyada fohisha sifatida ishlatish uchun olib ketmoqchi bo‘lgan ayol qo‘lga olingan.

Huquqni muhofaza qiluvchi organlar tomonidan o‘tkazilgan tadbir davomida Islom Karimov nomidagi Toshkent xalqaro aeroportida Bekobod shahrida vaqtincha yashovchi 1984-yilda tug‘ilgan Xolida Ahrorova qo‘lga olingan. U tanishlari — Bekobod tumanida yashovchi 1983-yilda tug‘ilgan Manzura Oripova va 1998-yilda tug‘ilgan Hulkaroy Nodirovalarni Malayziyaning Kuala-Lumpur shahridagi mehmonxonalarning birida o‘zining jinoiy sherigi “Sem” ismli tanishi bilan birga ulardan fohisha sifatida foydalanish maqsadida olib ketmoqchi bo‘lgan.

Ular Toshkent — Kuala-Lumpur yo‘nalishi orqali Malayziyaga chiqib ketayotgan vaqtida tadbir ishtirokchilari tomonidan jinoyat ustida qo‘lga olingan.

Xolida Ahrorovadan o‘zining, Manzura Oripova va Hulkaroy Nodirovaning nomiga band qilingan Toshkent — Kuala-Lumpur yo‘nalishidagi aviachiptalar ashyoviy dalil sifatida olingan.

Holat yuzasidan Xolida Ahrorovaga nisbatan O‘zbekiston Respublikasi Jinoyat Kodeksining tegishli moddalari bilan jinoyat ishi qo‘zg‘atilgan.