Qozog‘istonning Qarag‘andi viloyatidagi dashtga Boyqo‘ng‘irdan uchirilgan “Soyuz-2.1a” eltuvchi raketasi qismlari qulab tushishi natijasida yong‘in yuzaga keldi, oqibatda bir kishi halok bo‘lib, yana bir kishi jarohatlandi, deb yozadi “Interfaks” Qozog‘iston IIV vakiliga tayanib.
Talap qishlog‘idan 20 km janubi-g‘arbda “Progress MS-06” transport yuk kemasini olib ketayotgan eltuvchi raketa qismlari belgilangan hududga tushgani, biroq qurigan o‘tlar yonib ketgani haqida 14-iyun kuni 18:04 (Toshkent vaqti bilan 17:04)da xabar kelib tushgan. Bir yarim soatlardan keyin esa Jezkazgan shahridan 40 km naridagi dasht yonayotgani haqida xabar berishgan.
Yong‘in oqibatida 1964-yilda tug‘ilgan fuqaro kuyish natijasida halok bo‘ldi, 1968-yilda tug‘ilgan fuqaro kasalxonaga yotqizildi, ular eltuvchi raketaning ajraluvchi qismlarini to‘plash ishlarini bajarayotgan bo‘lgan.
61 kishi va 22 ta texnika ishtirokida yong‘inni bartaraf etishgan.
Izoh (0)