2015-yilning may oylarida, Yashnobod tumani hududida, muqaddam firibgarlik jinoyatini sodir etganligi uchun sudlangan Nurali Rizaqulov tanishi Erali Sobirovning ishonchiga kirib, “Otchopar bozori”dan do‘kon olib berishni va’da qilib, undan 25 500 AQSh dollari olib, o‘z ehtiyoji uchun sarflab yuborgan. Bu haqda Toshkent shahar IIBB matbuot xizmati xabar berdi.
Erali Sobirov ikki yil davomida Nurali Rizaqulovdan va’dasini bajarishini yoki pullarini qaytarib berishini talab qilgan. Biroq u turli bahonalar bilan aldab kelgan. Shundan so‘ng jabrdiyda huquqni muhofaza qiluvchi organlaridan yordam so‘rab, ariza bilan murojaat etdi.
2017-yilning 5-iyun kuni Yashnobod tumani IIB huzuridagi Tergov bo‘limi tomonidan O‘zbekiston Respublikasi JKning 168-moddasi 3-qismi “a” bandi (firibgarlik, ya’ni o‘zganing mulkini aldash va ishonchni suiiste’mol qilish yo‘li bilan ko‘p miqdorda qo‘lga kiritish) alomatlari bilan jinoyat ishi qo‘zg‘atildi.
Nurali Rizaqulovga nisbatan qamoqqa olish tarzidagi ehtiyot chorasi qo‘llandi. Hozirda dastlabki tergov harakatlari davom ettirilib, uning boshqa jinoyatlarga aloqadorligi tekshirilmoqda.
Izoh (0)