12-iyun kuni O‘zbekiston Prezidenti Shavkat Mirziyoyev va Qozog‘iston Prezidenti Nursulton Nazarboyev o‘rtasida telefon orqali muloqot bo‘lib o‘tdi. Bu haqda O‘zbekiston Tashqi ishlar vazirligi matbuot xizmati xabar berdi.
Shavkat Mirziyoyev o‘z hamkasbiga joriy yilning 8—9-iyunida Ostonaga Shanxay hamkorlik tashkilotiga a’zo davlatlar rahbarlari Kengashining yig‘ilishida ishtirok etish uchun borgan O‘zbekiston delegatsiyasiga ko‘rsatilgan mehmondo‘stlik va iliq qabul uchun chuqur minnatdorchilik bildirdi.
Suhbat chog‘ida Qozog‘iston poytaxtida tashkil etilgan sammit ShHT faoliyati rivojida tarixiy voqea bo‘lgani alohida qayd etildi. Uning muhim natijalaridan biri sifatida Hindiston va Pokistonning Tashkilotga to‘la huquqli a’zo sifatida qabul qilingani ta’kidlandi. ShHT doirasida faol hamkorlikni davom ettirishning ahamiyatiga alohida urg‘u berildi. O‘zbekiston rahbari Qozog‘iston tomonini “Ostona EKSPO — 2017” Xalqaro ko‘rgazmasini yuqori darajada tashkil etilgani bilan tabrikladi va tadbirning muvaffaqiyatli o‘tishini tiladi. Mazkur ko‘rgazma mintaqa mamlakatlariga yuqori texnologiyalar va investitsiyalarni jalb qilishda muhim rol o‘ynashiga ishonch bildirildi.
Shuningdek, tomonlar ikki tomonlama hamkorlik, xalqaro va mintaqaviy siyosatning dolzarb masalalarini ko‘rib chiqdi.
“Suhbat an’anaviy iliq va do‘stona muhitda, o‘zbek-qozoq munosabatlariga xos o‘zaro tushunish va hurmat ruhida bo‘lib o‘tdi”, — deyiladi TIV axborotida.
Izoh (0)