O‘zbekistonda kollej va litsey o‘quvchilari uchun bepul o‘qish imkoniyatini taqdim etadigan tanlov boshlandi

O‘zbekiston Kasaba uyushmalari federatsiyasi mamlakatdagi barcha o‘rta maxsus, kasb-hunar kolleji o‘quvchilari uchun tanlov e’lon qildi.

Tanlovning saralash bosqichiga 12-iyun kuni start berilgan va u internet tarmog‘idagi www.tanlov.yk.uz sayti orqali 16-iyunga qadar davom etadi.

Tanlov test shaklida bo‘ladi va ishtirokchilar mehnat huquqiga oid savollarga javob berishlari lozim.

Tanlovda g‘olib chiqqan ishtirokchilar quyidagi sovrinlar bilan taqdirlanadi:

• 1-o‘rin: O‘zbekiston hududidagi o‘quv markazlaridan birida uchta fandan ko‘pi bilan bir yillik bepul o‘qish uchun sertifikat;
• 2-o‘rin: O‘zbekiston hududidagi o‘quv markazlaridan birida ikkita fandan ko‘pi bilan bir yillik bepul o‘qish uchun sertifikat;
• 3-o‘rin: O‘zbekiston hududidagi o‘quv markazlaridan birida bitta fandan ko‘pi bilan bir yillik bepul o‘qish uchun sertifikat.

G‘oliblarga o‘z xohishiga binoan bepul o‘qish uchun berilgan sertifikat o‘rniga mukofot sifatida Lenovo Core i5 noutbugi (1-o‘rin), Samsung Galaxy Tab plansheti (2-o‘rin), Xiaomi RedMi Pro smartfoni (3-o‘rin) berilishi mumkin.

Shuningdek, g‘oliblar o‘z ixtiyori bo‘yicha bepul o‘qish huquqini boshqa shaxsga ham o‘tkazishi mumkin.

“Tanlov o‘rta maxsus, kasb-hunar ta’limi muassasalari o‘quvchilarining huquqiy madaniyatini yuksaltirish, ular o‘rtasida xalqaro va milliy mehnat standartlarining mohiyatini targ‘ib qilish, shu orqali faol fuqarolik pozitsiyasiga ega bo‘lgan avlodni tarbiyalashga hissa qo‘shish maqsadida o‘tkazilmoqda”, — deyiladi federatsiya axborotida.