Joriy yil 6-iyun kuni Chust shahridagi “Dehqon bozori” hududidan Tojiboy Turdiyevga tegishli Nexia 2 avtomobili olib qochildi. Noma’lum shaxs mashina kaliti uning yukxonasi qulfida qoldirilganidan foydalangandi. Bu haqda “Daryo”ga Namangan viloyati IIB YXXB matbuot guruhi ma’lum qildi.
Parishonxotir otaxon mashinasidan quruq qolganini oradan 1,5 soat o‘tib, bozordan chiqqanidan so‘ng payqadi. Ushbu xabar tuman ichki ishlar bo‘limiga kelib tushgan zahoti avtomobilni qidirib topish, jinoyatni qizig‘ida ochish bo‘yicha tezkor-qidiruv ishlari olib borildi.
Olib borilgan chora-tadbirlar natijasida avtomashina Chust shahridagi “Zarafshon” mahallasi hududida harakatlanib ketayotganligi aniqlandi va uni olib qochgan shaxs qo‘lga olindi. Farg‘ona viloyatining Quvasoy tumanida yashovchi Hotam Mamajonov (ism-sharif shartli) avtomobilni mast holatda boshqarib, Isuzu rusumli yuk mashinasining orqa qismiga urishga ham ulgurgandi.
Mazkur holat yuzasidan Hotam Mamajonovga nisbatan JKning 267-moddasi 1-qismi bilan jinoyat ishi qo‘zg‘atilib, dastlabki tergov harakatlariga kirishildi.
Izoh (0)