Amerikalik biznesmen Uorren Baffett bilan tushlik qilish huquqi 9-iyun, juma kuni AQShda xayriya kimoshdi savdosida 2,6 million dollarga sotildi. AP agentligining ma’lum qilishicha, kimoshdi savdosida g‘olib chiqqan shaxs anonim qolishni istagan, deb xabar berdi “TASS”.
Milliarderning o‘zi tomonidan 18-marotaba uyushtirilgan kimoshdi savdosi eBay internet-auksioni orqali onlayn amalga oshirildi. G‘olib Baffett bilan tushlik qilish imkoniyatini qo‘lga kiritadi va unga o‘zini qiziqtirgan savollarini berishi mumkin bo‘ladi. Kimoshdi savdosidan yig‘ilgan pullar San-Fransisko shahridagi boshpanasizlarga ko‘mak beruvchi Glide Foundation fondiga o‘tkaziladi.
Shu paytgacha bo‘lib o‘tgan barcha kimoshdi savdolari davomida Baffett 24 million dollardan ortiq mablag‘ yig‘ishga muvaffaq bo‘lgan.
Baffettning so‘zlariga ko‘ra, ushbu xayriya tashkilotiga pul yig‘ishiga xotini Syuzan sababchi bo‘lgan. Syuzan 2004-yilgacha, to vafot etguniga qadar Glide Foundation’da ko‘ngilli sifatida ishlagan.
O‘tgan yili kimoshdi savdosi 3,45 million dollar foyda keltirgan. 2015-yilda Xitoyning Dalian Zeus Entertainment kompaniyasi Baffett bilan restoranda suhbat qurish uchun 2,34 million dollar sarflashiga to‘g‘ri kelgan.
Baffett xayriya tushligini Nyu-Yorkdagi Smith and Wollensky restoranida tashkillashtiradi, g‘olib o‘zi bilan yana yetti kishini olib kelish huquqiga ham ega. 86 yoshli milliarderning aytishicha, tadbir ko‘pincha uch soat davom etadi. Suhbat davomida faqatgina milliarder kelajakda sarmoyasini nimaga tikishi mumkinligini muhokama qilish mumkin emas.
Izoh (0)