Deutsche Bank Tramp va uning oila a’zolariga berilgan kreditlarga Rossiya aloqadorligi haqidagi ma’lumotlarni taqdim etishdan bosh tortdi

Deutsche Bank amerikalik 5 nafar demokrat-kongressmenga prezident Tramp va uning oila a’zolariga berilgan kreditlarga Rossiya aloqadorligi haqidagi ma’lumotlarni taqdim etishdan bosh tortdi. Bank AQShning shaxsiy manbalar muhofazasi haqidagi qonunlarini ro‘kach qildi, deya xabar beradi “TASS”.

“Deutsche Bank Kongress va sud sir saqlanadigan axborot muhofazasi uchun belgilagan chegaralarni hurmat qilishi zarurligini tushunasiz, degan umiddamiz”, — deyiladi bankning kongressmenlarga javobida.

AQSh Kongressi vakillar palatasi moliyaviy xizmatlar qo‘mitasining 5 nafar demokrat a’zosi 23-may kuni Deutsche Bank ofisiga Tramp hisob-raqamlaridagi harakatlarga oid ma’lumotlarni taqdim etish so‘ralgan maktub yo‘llagandi.

Reuters ma’lumotlariga ko‘ra, kongressmenlar Rossiya hukumati chindan ham Trampning ko‘chmas mulk operatsiyalari uchun bank ajratadigan kreditlarga kafil bo‘lganiga aniqlik kiritishni so‘ragan.