Америкалик бизнесмен Уоррен Баффетт билан тушлик қилиш ҳуқуқи 9 июнь, жума куни АҚШда хайрия кимошди савдосида 2,6 миллион долларга сотилди. AP агентлигининг маълум қилишича, кимошди савдосида ғолиб чиққан шахс аноним қолишни истаган, деб хабар берди «ТАСС».
Миллиардернинг ўзи томонидан 18-маротаба уюштирилган кимошди савдоси eBay интернет-аукциони орқали онлайн амалга оширилди. Ғолиб Баффетт билан тушлик қилиш имкониятини қўлга киритади ва унга ўзини қизиқтирган саволларини бериши мумкин бўлади. Кимошди савдосидан йиғилган пуллар Сан-Франциско шаҳридаги бошпанасизларга кўмак берувчи Glide Foundation фондига ўтказилади.
Шу пайтгача бўлиб ўтган барча кимошди савдолари давомида Баффетт 24 миллион доллардан ортиқ маблағ йиғишга муваффақ бўлган.
Баффеттнинг сўзларига кўра, ушбу хайрия ташкилотига пул йиғишига хотини Сюзан сабабчи бўлган. Сюзан 2004 йилгача, то вафот этгунига қадар Glide Foundation’да кўнгилли сифатида ишлаган.
Ўтган йили кимошди савдоси 3,45 миллион доллар фойда келтирган. 2015 йилда Хитойнинг Dalian Zeus Entertainment компанияси Баффетт билан ресторанда суҳбат қуриш учун 2,34 миллион доллар сарфлашига тўғри келган.
Баффетт хайрия тушлигини Нью-Йоркдаги Smith and Wollensky ресторанида ташкиллаштиради, ғолиб ўзи билан яна етти кишини олиб келиш ҳуқуқига ҳам эга. 86 ёшли миллиардернинг айтишича, тадбир кўпинча уч соат давом этади. Суҳбат давомида фақатгина миллиардер келажакда сармоясини нимага тикиши мумкинлигини муҳокама қилиш мумкин эмас.
Изоҳ (0)