O‘zbekiston Shanxay hamkorlik tashkiloti mamlakatlari bilan savdo-iqtisodiy aloqalarni chuqurlashtirishni yoqlab chiqadi. Bu haqda Shavkat Mirziyoyev tashkilotning Ostonada o‘tayotgan sammitidagi chiqishida ma’lum qildi, deb xabar bermoqda “Gazeta.uz”.
Davlat rahbari O‘zbekiston Xitoyning “Bir mintaqa, bir yo‘l” tashabbusi doirasida katta loyihalar realizatsiyasiga muhim ahamiyat qaratishini ta’kidlab o‘tdi.
Uning fikricha, transport-kommunikatsiya loyihalari realizatsiyasiga alohida e’tibor qaratmoq lozim.
“Tashkilotimizning eng muhim ustuvor maqsadi ShHT mintaqasining ulkan transport salohiyatini ochish bo‘lishi lozim”, — dedi Prezident.
“‘Xitoy–Qirg‘iziston–O‘zbekiston’ temir yo‘li qurilishining tezroq boshlanishi eng qisqa vaqtda mamlakatlarimiz jahon bozoriga chiqishini ta’minlashi mumkin”, — qo‘shimcha qildi Shavkat Mirziyoyev.
Shuningdek, u butun mintaqa tranzit salohiyatini samarador rivojlantirish bo‘yicha takliflarni muvofiqlashtirish uchun ShHT mamlakatlari temir yo‘l ma’muriyatlari rahbarlarining muntazam uchrashuvlari mexanizmini yo‘lga qo‘yishni taklif qildi.
“Mamlakatlarimiz iqtisodiyoti rivojida hamda xalqlar o‘rtasidagi aloqalar mustahkamlanishida ShHTga a’zo mamlakatlar mintaqalari va ishbilarmon davralari o‘rtasida to‘g‘ridan-to‘g‘ri aloqalarni yo‘lga qo‘yish muhim ahamiyat kasb etadi”, — qayd qildi Shavkat Mirziyoyev.
U fan va texnika sohasida ustuvor hamkorlik yo‘nalishlari istiqbolli ro‘yxatini ishlab chiqishni taklif qildi.
O‘zbekiston rahbari ShHT davlatlari va xalqlari o‘rtasida o‘zaro ishonch, qo‘shnichilik va do‘stlikni mustahkamlash zarurligiga alohida urg‘u berdi. Mazkur yo‘nalishda u ShHT markazlari — doimiy faoliyat yuritayotgan xalq diplomatiyasi institutlarini joriy etish taklifi bilan chiqdi. Bu markazlarda qo‘shma ko‘rgazmalar, konferensiyalar va uchrashuvlar o‘tkazilishi, bu esa, o‘z navbatida, ShHT xalqlari o‘rtasida samimiyatning oshishiga yordam berishi mumkin.
O‘zbekistonning fikricha, hamkorlikning yana bir istiqbolli yo‘nalishi turizm sohasidir.
Izoh (0)