Ўзбекистон Шанхай ҳамкорлик ташкилоти мамлакатлари билан савдо-иқтисодий алоқаларни чуқурлаштиришни ёқлаб чиқади. Бу ҳақда Шавкат Мирзиёев ташкилотнинг Остонада ўтаётган саммитидаги чиқишида маълум қилди, деб хабар бермоқда «Газета.uz».
Давлат раҳбари Ўзбекистон Хитойнинг «Бир минтақа, бир йўл» ташаббуси доирасида катта лойиҳалар реализациясига муҳим аҳамият қаратишини таъкидлаб ўтди.
Унинг фикрича, транспорт-коммуникация лойиҳалари реализациясига алоҳида эътибор қаратмоқ лозим.
«Ташкилотимизнинг энг муҳим устувор мақсади ШҲТ минтақасининг улкан транспорт салоҳиятини очиш бўлиши лозим», — деди Президент.
«‘Хитой–Қирғизистон–Ўзбекистон’ темир йўли қурилишининг тезроқ бошланиши энг қисқа вақтда мамлакатларимиз жаҳон бозорига чиқишини таъминлаши мумкин», — қўшимча қилди Шавкат Мирзиёев.
Шунингдек, у бутун минтақа транзит салоҳиятини самарадор ривожлантириш бўйича таклифларни мувофиқлаштириш учун ШҲТ мамлакатлари темир йўл маъмуриятлари раҳбарларининг мунтазам учрашувлари механизмини йўлга қўйишни таклиф қилди.
«Мамлакатларимиз иқтисодиёти ривожида ҳамда халқлар ўртасидаги алоқалар мустаҳкамланишида ШҲТга аъзо мамлакатлар минтақалари ва ишбилармон давралари ўртасида тўғридан-тўғри алоқаларни йўлга қўйиш муҳим аҳамият касб этади», — қайд қилди Шавкат Мирзиёев.
У фан ва техника соҳасида устувор ҳамкорлик йўналишлари истиқболли рўйхатини ишлаб чиқишни таклиф қилди.
Ўзбекистон раҳбари ШҲТ давлатлари ва халқлари ўртасида ўзаро ишонч, қўшничилик ва дўстликни мустаҳкамлаш зарурлигига алоҳида урғу берди. Мазкур йўналишда у ШҲТ марказлари — доимий фаолият юритаётган халқ дипломатияси институтларини жорий этиш таклифи билан чиқди. Бу марказларда қўшма кўргазмалар, конференциялар ва учрашувлар ўтказилиши, бу эса, ўз навбатида, ШҲТ халқлари ўртасида самимиятнинг ошишига ёрдам бериши мумкин.
Ўзбекистоннинг фикрича, ҳамкорликнинг яна бир истиқболли йўналиши туризм соҳасидир.
Изоҳ (0)