O‘zbekiston Prezidenti Shavkat Mirziyoyev Ostonadagi Shanxay hamkorlik tashkiloti sammitida qilgan chiqishida tashkilotning ta’sis hujjatlariga mintaqaviy aksilterror strukturasi vakolatlarini kengaytirish bo‘yicha o‘zgartishlar kiritishni taklif etdi. Bu haqda “Gazeta.uz” xabar bermoqda.
“Bugun xalqaro terrorchi guruhlar va destruktiv kuchlar borgan sayin ko‘proq axborot texnologiyalarini qo‘llamoqda, yoshlarimizni zombilashtirish va zo‘ravonlik mafkurasini tarqatishda ulardan agressiv foydalanmoqda”, — dedi O‘zbekiston rahbari.
U aksilterror strukturasiga global axborot maydonida yuzaga keladigan tahdidlar monitoringi va ularga qarshi kurashish vakolatlarini berishni taklif qildi.
Shavkat Mirziyoyev, shuningdek, o‘sib borayotgan avlodning turli terrorchi va radikal guruhlar tarkibiga qo‘shilishiga yo‘l qo‘ymaslik bo‘yicha qo‘shma choralar ko‘rish zarurligini qayd qildi.
“Ma’rifatga, yoshlarning ma’naviy va axloqiy tarbiyasiga alohida e’tibor qaratish, ularda bilim va o‘z ustida ishlashga intilishni shakllantirish muhim deb hisoblaymiz”, — qayd qildi O‘zbekiston rahbari.
Jumladan, shu maqsadda Samarqandda Islom hamkorlik tashkiloti ko‘magida Imom Buxoriy nomidagi xalqaro tadqiqot markazi tashkil etilayotganini aytib o‘tdi.
“O‘ylaymizki, bu markaz ishi konfessiyalararo, millatlararo va madaniy muloqotga yordam berishi mumkin. Biz yaratilayotgan markaz ishida ShHT mamlakatlari diniy davralari faol ishtirok etishiga umid qilmoqdamiz”, — dedi Shavkat Mirziyoyev.
Izoh (0)