Ўзбекистон Президенти Шавкат Мирзиёев Остонадаги Шанхай ҳамкорлик ташкилоти саммитида қилган чиқишида ташкилотнинг таъсис ҳужжатларига минтақавий аксилтеррор структураси ваколатларини кенгайтириш бўйича ўзгартишлар киритишни таклиф этди. Бу ҳақда «Газета.uz» хабар бермоқда.
«Бугун халқаро террорчи гуруҳлар ва деструктив кучлар борган сайин кўпроқ ахборот технологияларини қўлламоқда, ёшларимизни зомбилаштириш ва зўравонлик мафкурасини тарқатишда улардан агрессив фойдаланмоқда», — деди Ўзбекистон раҳбари.
У аксилтеррор структурасига глобал ахборот майдонида юзага келадиган таҳдидлар мониторинги ва уларга қарши курашиш ваколатларини беришни таклиф қилди.
Шавкат Мирзиёев, шунингдек, ўсиб бораётган авлоднинг турли террорчи ва радикал гуруҳлар таркибига қўшилишига йўл қўймаслик бўйича қўшма чоралар кўриш зарурлигини қайд қилди.
«Маърифатга, ёшларнинг маънавий ва ахлоқий тарбиясига алоҳида эътибор қаратиш, уларда билим ва ўз устида ишлашга интилишни шакллантириш муҳим деб ҳисоблаймиз», — қайд қилди Ўзбекистон раҳбари.
Жумладан, шу мақсадда Самарқандда Ислом ҳамкорлик ташкилоти кўмагида Имом Бухорий номидаги халқаро тадқиқот маркази ташкил этилаётганини айтиб ўтди.
«Ўйлаймизки, бу марказ иши конфессиялараро, миллатлараро ва маданий мулоқотга ёрдам бериши мумкин. Биз яратилаётган марказ ишида ШҲТ мамлакатлари диний давралари фаол иштирок этишига умид қилмоқдамиз», — деди Шавкат Мирзиёев.
Изоҳ (0)