Angliyaning “Liverpul” futbol klubiga egalik qiluvchi Fenway Sports Group (FSG) Ispaniyaning “Xetafe” jamoasini bosqichma-bosqich sotib olish bo‘yicha muzokaralar olib bormoqda. Bu haqda The Athletic nashri xabar berdi.
Manbaga ko‘ra, Amerika kompaniyasi “Liverpul” atrofida bir nechta klubdan iborat futbol guruhini shakllantirishni rejalashtirmoqda. Shu yo‘nalishda ular ilgari Ispaniyaning “Malaga” va Fransiyaning “Bordo” klublari bilan ham muzokaralar o‘tkazgan, biroq tomonlar kelishuvga erisha olmagan. Hozirda mazkur kompaniya “Xetafe”ni sotib olish bo‘yicha muzokara boshlagan.
Ma’lum qilinishicha, “Xetafe” uzoq yillar davomida xaridor izlab kelgan. Klub egasi Anxel Torres dastlab jamoasini 160 million funt sterlingga bo‘lgan bo‘lsa, hozirda bu narxni 100 million funtgacha tushirgan.
Shu bilan birga, Anxel Torres jamoani sotishga shoshilmayapti. Sababi, “Xetafe”ning uy uchrashuvlari o‘tkaziladigan “Kolizey Alfonso Peres” stadionida rekonstruksiya ishlari olib borilmoqda. Ushbu loyiha 2028-yilda yakunlanishi kutilmoqda. Shundan keyin klubni sotish bo‘yicha jiddiy o‘ylab ko‘rishi kutilmoqda.
Ma’lumot uchun, Fenway Sports Group 2001-yilda tashkil etilgan bo‘lib, 2002-yilda “Boston Red Soks” beysbol klubini va uning “Fenway Park” stadionini sotib olgan. Shuningdek, 2010-yilda “Liverpul” futbol klubi va 2021-yilda NHL’dagi “Pittsburg Pingvins” xokkey jamoasi ham ushbu guruh tomonidan xarid qilingan.
Izoh (0)