Shanxay hamkorlik tashkilotining a’zo davlatlari rahbarlari 9-iyun, juma kuni Ostonada bo‘lib o‘tgan sammitda Hindiston va Pokistonning ShHT a’zoligiga qabul qilinish jarayoni yakunlangani va ularga ShHTning a’zo davlati maqomi berilishi haqidagi qarorni imzoladi. Bu haqda “Gazeta.uz” xabar berdi.
Hindiston va Pokistonning ShHT a’zo davlati maqomini olishi maqsadidagi majburiyatlari haqidagi memorandum ShHTning 2016-yil iyun oyida Toshkentda bo‘lib o‘tgan sammitida imzolangan edi.
Sammitda nutq so‘zlagan O‘zbekiston Prezidenti Shavkat Mirziyoyev Hindiston va Pokistonning ShHTga a’zo davlat maqomini olishi mamlakatlar o‘rtasidagi ko‘p tarmoqli hamkorlikning kelajakdagi rivoji uchun prinsipial jihatdan yangi imkoniyatlar yaratishini qayd etdi .
Shuningdek, ShHT yetakchilari ShHTning ekstremizmga qarshi kurash bo‘yicha Konvensiyasini imzoladi va xalqaro terrorizmga qarshi hamkorlikda kurash bo‘yicha Bayonotni qabul qildi.
ShHT davlat rahbarlari Kengashi yig‘ilishi doirasida 2017—2018-yillarda ShHT a’zo davlatlarining turizm sohasida hamkorligi Dasturini amalga oshirish bo‘yicha qo‘shma harakatlar Rejasi hamda ShHT kotibiyati va Xalqaro Qizil Xoch Qo‘mitasi o‘rtasidagi anglashinuv Memorandumi imzolandi.
Izoh (0)