Шанхай ҳамкорлик ташкилотининг аъзо давлатлари раҳбарлари 9 июнь, жума куни Остонада бўлиб ўтган саммитда Ҳиндистон ва Покистоннинг ШҲТ аъзолигига қабул қилиниш жараёни якунлангани ва уларга ШҲТнинг аъзо давлати мақоми берилиши ҳақидаги қарорни имзолади. Бу ҳақда «Газета.uz» хабар берди.
Ҳиндистон ва Покистоннинг ШҲТ аъзо давлати мақомини олиши мақсадидаги мажбуриятлари ҳақидаги меморандум ШҲТнинг 2016 йил июнь ойида Тошкентда бўлиб ўтган саммитида имзоланган эди.
Саммитда нутқ сўзлаган Ўзбекистон Президенти Шавкат Мирзиёев Ҳиндистон ва Покистоннинг ШҲТга аъзо давлат мақомини олиши мамлакатлар ўртасидаги кўп тармоқли ҳамкорликнинг келажакдаги ривожи учун принципиал жиҳатдан янги имкониятлар яратишини қайд этди .
Шунингдек, ШҲТ етакчилари ШҲТнинг экстремизмга қарши кураш бўйича Конвенциясини имзолади ва халқаро терроризмга қарши ҳамкорликда кураш бўйича Баёнотни қабул қилди.
ШҲТ давлат раҳбарлари Кенгаши йиғилиши доирасида 2017—2018 йилларда ШҲТ аъзо давлатларининг туризм соҳасида ҳамкорлиги Дастурини амалга ошириш бўйича қўшма ҳаракатлар Режаси ҳамда ШҲТ котибияти ва Халқаро Қизил Хоч Қўмитаси ўртасидаги англашинув Меморандуми имзоланди.
Изоҳ (0)