O‘zbekistonda xorijiy investorlar ishtirokida uchta mineral o‘g‘it koni o‘zlashtiriladi

Milliy matbuot markazida Davlat geologiya va mineral resurslar qo‘mitasi tomonidan matbuot anjumani o‘tkazildi, deya xabar bermoqda O‘zA.

Anjumanda O‘zbekistonda tabiiy resurslarni muhofaza qilish va ulardan oqilona foydalanish, foydali qazilmalarni izlash, qidirish va chamalash ishlarini olib borishda yangi texnologiyalar yordamida geologiya-qidiruv ishlari olib borilayotgani qayd etildi.

Ma’lumotlarga ko‘ra, mustaqillik yillarida O‘zbekistonda to‘rtta yangi mineral o‘g‘it koni ochilgan. Ulardan uchtasi fosforit, bittasi kaliy tuzi konidir.

Qo‘mita boshqarma boshlig‘i Qodirjon Mingboyevning so‘zlariga ko‘ra, 2016-yili xorijiy investorlarga qattiq foydali qazilma konlari qatorida o‘zlashtirishga tayyor bo‘lgan uchta mineral o‘g‘it koni taklif etilgan.