Davlat raqobat qo‘mitasi Toshkent viloyati hududiy boshqarmasiga 2017-yilning o‘tgan 5 oyi davomida fuqarolardan iste’molchi sifatida huquqlari buzilayotganligi to‘g‘risida jami 267 ta murojaat kelib tushdi, deb xabar berdi Biznes-daily.
Ularning asosiy qismi (83,9 foizi, ya’ni 224 tasi) kommunal soha bo‘yicha bo‘lib, ushbu murojaatlarning 164 tasi (73,2 foizi yoki umumiy arizalarning 61,4 foizi) tabiiy gaz ta’minoti sohasida yuzaga kelayotgan muammolar xususidadir. Murojaatlarni o‘rganish davomida, haqiqatan ham, fuqarolarning hisobiga gaz ta’minoti korxonalari tomonidan asossiz ravishda 2—3 million so‘m miqdorda qarzdorlik hisoblangani ma’lum bo‘ldi.
Xonadonlarda o‘rganishlar o‘tkazilganda guvohlarsiz dalolatnomalar tuzish, hech qanday ogohlantirishsiz energiya ta’minotidan uzib qo‘yish, shuningdek, hisoblagichlarni belgilangan muddatlarda davlat qiyoslash ko‘rigidan o‘tkazish choralari ko‘rilmayotgani va buning oqibatida turli subyektiv muammolar yuzaga kelayotgani aniqlanmoqda.
Misol uchun, Chinoz tumani, “Eski Toshkent” QFY, “Paxta” qo‘rg‘oni, G‘afur G‘ulom ko‘chasida istiqomat qiluvchi F.Temiraliyevaning murojaati o‘rganilganda, iste’molchining xonadonidagi gazni hisobga olish moslamasi belgilangan muddatda davlat qiyoslash ko‘rigidan o‘tgan ekan. Hisoblagich ko‘rsatkichi bo‘yicha qarzdorligi 1 289 245 so‘mni tashkil etganligiga qaramasdan, tumangaz ABT bazasida iste’molchining hisobiga asossiz ravishda 3 027 339 so‘m qarzdorlik qayd etilgan.
Toshkent shahar, Sergeli 4-mavze, 2-uyda yashovchi X.To‘raboyevaga tegishli Yangiyo‘l tumani, “M.Boboyev” QFY, Xusnulik ko‘chasidagi xonadonga tumangaz korxonasi tomonidan asossiz ravishda 1,4 million so‘m miqdorda qarzdorlik hisoblangan. Iste’molchining bu boradagi murojaati o‘rganilganda, xonadon egasi tomonidan belgilangan muddatlarda gaz ta’minoti korxonasiga tegishli ma’lumotlar berilmagani natijasida tumangaz ABT bazasida uning hisobiga asossiz (1,4 million so‘m miqdorda) qarzdorlik yozilgani ma’lum bo‘ldi.
Shu bilan birga, ba’zi iste’molchilar tomonidan gaz tarmog‘iga o‘zboshimchalik bilan ulanish, yozma ogohlantirishga qaramay hisoblagichni davlat qiyoslash ko‘rigidan o‘tkazish chorasini ko‘rmaslik, to‘lovlarni belgilangan muddatlarda to‘lamaslik, hisoblagichga tashqi ta’sir ko‘rsatish kabi gazdan foydalanish qoidalarini buzish holatlari ham uchrab turibdi.
Masalan, Qibray tumani, “Geofizika” qo‘rg‘oni, “Yangiobod” QFY, 57-harbiy shaharchada yashovchi fuqaroning murojaati o‘rganilganda uning xonadonida 1 dona PG-4 (gaz plita), 1 dona IP (isitish pechi) va 1 dona “Titan” gaz jihozi gaz tarmog‘iga to‘g‘ridan to‘g‘ri ulangani holda foydalanib kelinayotgani, ya’ni gaz hisoblagich iste’molchi tomonidan o‘zboshimchalik bilan yechib olingani aniqlandi.
Izoh (0)