Manchesterda yuz bergan terakt qurbonlari xotirasi uchun 25-may kuni butun Buyuk Britaniyada bir daqiqalik umummilliy sukut saqlash marosimi bo‘lib o‘tdi. Bu haqda “TASS” xabar bermoqda.
O‘quv muassasalari, politsiya bo‘linmalari va boshqa joylardagi rasmiy marosimlardan tashqari, butun mamlakat bo‘ylab oddiy odamlar ham qurbonlar xotirasiga hurmat bajo keltirish maqsadida bir daqiqa sukut saqladi.
Twitter’ning yuzlab foydalanuvchilari hamdardlik so‘zlari bitilgan xabarlarni qoldirdi. Ulardan birining ma’lum qilishicha, mahalliy vaqt bilan soat roppa-rosa 11:00 bo‘lganida u ketayotgan avtobus haydovchisi avtobusni bir daqiqa davomida to‘xtatib turgan.
Umummilliy sukut daqiqasi aksiyasiga xorijda istiqomat qilayotgan ko‘plab britaniyaliklar ham qo‘shilgan.
23-mayga o‘tar kechasi Manchester Arena yopiq stadionida amerikalik xonanda Ariana Grandening konserti yakuniga yetgani hamonoq portlash yuz berdi. Hodisa oqibatida 22 kishi halok bo‘ldi, 75 kishi tan jarohati oldi.
Politsiya axborotiga ko‘ra, terakt 22 yoshli Salmon Obidiy tomonidan amalga oshirilgan. OAV axborotiga ko‘ra, u Buyuk Britaniyada, liviyalik qochoqlar oilasida dunyoga kelgan.
Izoh (0)