Xoshim Obidiy akasi Manchesterda terakt tayyorlayotganini bilgani ma’lum qilindi

Salmon Obidiyning ukasi Manchesterda tayyorlanayotgan terakt haqida bilgan, biroq bu qachon va qayerda sodir bo‘lishidan bexabar bo‘lgan. Bu haqda Liviya aksilterror bo‘linmasi rasmiy vakili Ahmad Dog‘dug‘ ma’lum qildi, deya xabar beradi “RIA Novosti”.

Rasmiy vakilga ko‘ra, Xoshim Obidiy bu haqda Liviyadagi so‘roq chog‘ida aytib berdi. Shuningdek, u portlovchi qurilma qanday tayyorlanganini bilgan va akasini uni mustaqil ravishda yig‘ganini taxmin qildi.

Aka-ukalar juda yaqin bo‘lgan: teraktdan yarim soat avval Salmon ukasi va onasi bilan telefon orqali bog‘lanishga harakat qilgan.

Liviya rasmiylarining bildirishicha, aka-ukalar o‘zlarini IShID a’zosi hisoblagan va jangarilarning internetdagi videolari, jumladan, portlovchi qurilma tayyorlash haqidagi lavhalarni o‘rgangan.

IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.