AQSh prezidenti Donald Tramp filippinlik hamkasbi Rodrigo Duterte bilan telefon suhbati chog‘ida KXDR lideri Kim Chen Inni “yadroviy qurolga ega devona” deb atadi. Bu haqda The Washington Post’ga tayanib, “Gazeta.ru” xabar berdi.
Xabar berilishicha, nashrga 29-aprel kuni Tramp va Duterte orasida bo‘lib o‘tgan suhbat qaydlari kelib tushgan.
Tramp Shimoliy Koreyaning omadsiz raketa sinovlaridan “qisman ko‘ngli to‘lgani”ni bildirib, “barcha raketalari omadsizlikka uchrayotgani”ni va bu “yaxshi yangilik” ekanligini ta’kidlagan.
Duterte esa Kim Chen Inni “o‘zining bombalari — o‘z o‘yinchoqlari bilan o‘ynamoqda” dedi va “uning aqli yaxshi ishlamaydi hamda u telba bo‘lib qolishi mumkin” deya taxmin qildi.
Tramp ham o‘z navbatida Pentagon tomonidan Koreya yarimoroliga yuborilgan AQShning ikkita atom suvosti kemasinining “kuchi ko‘p ekanligini” qayd etdi.
“Biz yadroviy qurolga ega devonaning ozodlikda bo‘lishiga yo‘l qo‘ya olmaymiz. Biz undan 20 marta ko‘proq kuchga egamiz, biroq undan foydalanishni istamaymiz”, — dedi Tramp.
Izoh (0)