22-may kuni Buyuk Britaniyaning Manchester shahridagi stadionda yuz bergan terakt oqibatida 22 kishi halok bo‘ldi, 59 kishi jarohat oldi, deb xabar berdi “TASS”.
Portlash ro‘y bergan stadionda amerikalik qo‘shiqchi Ariana Grande konsert berayotgan edi. Ushbu terakt 2000-yildan beri konsert yoki musiqiy festivallarda sodir bo‘lgan to‘rtinchi yirik teraktdir.
2003-yil 5-iyul. Moskvadagi Tushinskiy aerodromida “Qanotlar” rok-festivali bo‘layotgan mahalda ikki nafar terrorchi-xudkush portlovchi qurilmani ishga tushirib yuborgan. Bitta portlash g‘azna yonida, ikkinchisi — aerodrom hududiga kirishning yaqin joyida sodir bo‘lgan. Voqea joyida 10 kishi halok bo‘lgan, 57 nafar odam jarohat olgan. To‘rt nafar jabrlanuvchining joni shifoxonada uzilgan.
Hujumni chechen millatiga mansub 19 yoshli Zulixan Elixajiyeva va 28 yoshli Maryam Sharipova amalga oshirgan. Portlovchi qurilmalarning uchinchisi Zarama Mujaxoyevada bo‘lgan, biroq u ishlamay qolgan — terrorchi 10-iyul kuni qo‘lga olingan va 20 yilga qamoq jazosiga mahkum qilingan. Teraktni tashkillashtirish bo‘yicha mas’uliyatni chechen terrorchisi Shamil Basayev o‘z bo‘yniga olgan.
2010-yil 26-may. Rossiyaning Stavropol shahridagi madaniyat va sport saroyi yaqinida, “Vaynax” chechen raqs ansamblining konserti boshlanishi arafasida portlash ro‘y bergan. Bomba sharbat qog‘ozxaltasi ostiga yashirilgan bo‘lgan. Kirish eshigida navbatda turgan sakkiz nafar inson halok bo‘lgan, 16 kishi jarohat olgan. 2010-yil noyabrda terakt tashkilotchilaridan biri, Dog‘istonda istiqomat qiluvchi Cherkes Rustamov qo‘lga olingan edi. U umrbod qamoq jazosiga mahkum qilingan. 2011-yilda maxsus operatsiya natijasida Rustamovning ikki nafar sherigi yo‘q qilingan.
2015-yil 13-noyabr. Parij va Sen-Deni shahri yaqinida deyarli bir vaqtning o‘zida muvofiqlashtirilgan teraktlar seriyasi ro‘y bergan edi. Terrorchi-xudkushlar Eagles of Death Metal rok guruhi konsert berayotgan Bataclan konsert zaliga hujum uyushtirgan. Tomoshaga kelganlar terrorchilar tomonidan asirga olingan edi, politsiyaning maxsus kuchlari yetib kelganidan so‘ng esa ommaviy otishmani boshlagan. Bataclan zalida 89 nafar odam halok bo‘lgan (13-noyabr kuni sodir bo‘lgan teraktlar seriyasi oqibatida umumiy miqdorda 130 kishi halok bo‘lgan edi). Terakt bo‘yicha mas’uliyatni IShID tashkiloti o‘z bo‘yniga olgan.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)